Mittelalter 2001/4
Heft 2001/4    1. Artikel

Ein Badehaus mit Heizungsanlage auf der Burgruine Schlössel bei Klingenmünster

Resumaziun

par Dieter Barz

La ruina da chastè Schlössel è situada sper Klingenmünster en la Pfalz (DEU). Dapi l'onn 1988 vegnan fatgas exchavaziuns en il chastè, dal qual in num nun è enconuschent. En ina fortezza pli veglia han ins erigì enturn 1030/50 in chastè da signuria ch'è vegnì destruì en tut trais giadas. Il chastè central è davent da l'entschatta stà dividì tras in mir en dus spazis, v. d. en la "part signurila" cun la tur residenziala, il pierten, la pitschna curt interna ("curt sura") ed en l'uschenumnada "curt d'economia". En la curt d'economia predominavan en la fasa 1 per gronda part las activitads manualas.

Suenter la destrucziun è sa midada en la fasa 2 la surbajegiada da questa zona. Enfin qua èn vegnids chattads ultra d'ina chasa da crap dus edifizis, dals quals las travs da la traversa eran mantegnidas sco fundaments. Questa fasa po vegnir datada tenor chats da munaidas enturn il davos terz da l'indeschavel tschientaner.

L'edifizi dal sid d'ina grondezza da circa 8 x 6.5 m stat isolà en la curt ed è ina construcziun da travs. En il chantun dal sid-vest sa chattava in chamin. La part principala da l'edifizi è in grond implant da stgaudament furmà d'in local da lavur cun arvieut, pigna ed in chanal. A quest cumplex manava ina stgala da crap. La pigna sa cumponiva d'in sectur da fieu e d'in sectur d'aria chauda suren. In chamin manca, uschia ch'ils gas da fim stuevan sortir tras l'arvieut dal local da lavur. Dal sectur d'aria chauda va il chanal en lingia rectangulara – senz'ulteriuras averturas – en l'axa longitudinala da l'edifizi. Nus pudain supponer ch'i deva qua ina «chasa per far bogns». L'implant da stgaudament serva, sco ch'i para, en emprima lingia per far bogns da vapur. Cun avrir ina serradira da crap vegniva auzada la temperatura interna e la vapur vegniva producida cun derscher aua sin il chanal chaud. I nun è d'excluder che questa stanza vegniva er utilisada per far bogns en bogneras; en il conturn dal chamin han ins chattà oss braschads, quai ch'inditgescha ch'i vegniva er mangià durant far bogn. En funtaunas documentadas e litteraras vegnan bogneras e bogns da vapur spezials gia menziunads en l'indeschavel e dudeschavel tschientaner. Fin il temp medieval tardiv eran quests bogns probablamain resalvads als chastellans ed a lur famiglias.

Translaziun: Lia rumantscha, Cuira

Barz, Dieter : Ein Badehaus mit Heizungsanlage auf der Burgruine Schlössel bei Klingenmünster
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 6. Jahrgang 2001, Heft 4, .

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch