Mittelalter 2002/3
Heft 2002/3    1. Artikel

La chatscha dal temp medieval e sia presentaziun èn il Codex Manesse

par Marco Redolfi

La «Manessische Liederhandschrift» cun sias pli diversas illustraziuns davart il tema da la chatscha è ina da las pli impurtantas funtaunas per la chatscha nobel-curtaisa dal temp medieval tardiv. Las illustraziuns dattan infurmaziuns interessantas davart las diversas furmas ed usits da chatscha. Ins sto però far tschertas resalvas en quai che pertutga la significaziun da las illustraziuns. Las miniaturas en la «Manessische Liederhandschrift» sa limiteschan a la represchentaziun da la vita curtaisa ed aristocrata dal temp medieval. Il Codex Manesse represchenta damai sulettamain la chatscha curtaisa. I fiss però fallà da concluder che mo ils nobels sajan ids a chatscha en il temp medieval. La represchentaziun da la vita curtaisa en tut ses detagls en furma d'ina autorepreschentaziun – sco tala ston ins considerar il Codex Manesse – idealisescha er in pau las relaziuns realas. Quai na vul dentant betg dir che las activitads represchentadas sajan inventadas – il cuntrari: gist tras questa moda d'idealisaziun mussan las illustraziuns numerus detagls che dattan interessantas infurmaziuns davart usits, iseglia, vestgadira u furmas da represchentaziun dal temp medieval.

Malgrà quai datti però ina tscherta mancanza en quai che pertutga l'illustraziun da la chatscha dal temp medieval. Represchentà vegn la chatscha cun utschels, la chatscha cun chauns e la chatscha dad urs. I dat dentant en egl che la chatscha da chamutschs e da capricorns manca, la quala era cumbinada per il solit cun excursiuns da plirs dis. Gist questa furma da chatscha vegniva pratitgada bunamain mo dals nobels e betg da la populaziun purila. Sin las illustraziuns na chatt'ins er betg tut la selvaschina da chatscha dal temp medieval. Ma quai che pertutga la represchentaziun da las differentas tecnicas da chatscha, da las armas, da la vestgadira u d'auters meds d'agid, na pon ins crititgar nagut. Surtut l'equipament eraldic sa fa valair cun tut ses detagls, quai che stat era puspè en connex cun l'idealisaziun, perquai che gist l'equipament eraldic vegniva purtà sco simbol da status per demonstrar l'appartegnientscha a la classa superiura dals chavaliers.

Malgrà la moda da preschentaziun idealisanta e gist pervi da l'amur per ils detagls èn las miniaturas da la «Manessische Liederhandschrift» ina da las pli impurtantas funtaunas per perscrutar la chatscha curtaisa sco era per tut la vita curtaisa dal temp medieval.

Translaziun: Lia rumantscha, Cuira

Redolfi, Marco : Die Mittelalterliche Jagd und ihre Darstellung im Codex Manesse
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 7. Jahrgang 2002, Heft 3, .

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch