Mittelalter 2002/4
Heft 2002/4    1. Artikel

Kastro sper Chório sin l'insla Sými (Grezia)

par Michael Losse

L'insla Sými tutga tar la regiun da Rhodos a l'intern dal district administrativ Dodekanes e sa chatta damanaivel da la Tirchia. Da 1307 fin 1522 appartegneva l'insla al stadi da l'urden dals Johannits cun ses center a Rhodos.

Sur la fracziun Chório da la citad da Sými sa dauza in crest grippus. Gia dal temp ellenistic (4./5avel tschientaner a. Cr.) era bajegià là in center cun in chastè (akropolis). En il decurs dal 15avel tschientaner, cura che las attatgas dals Osmans sin il stadi da l'urden s'augmentavan, èn vegnids integrads ils mirs da defensiun antics en in chastè medieval. Ils gronds maisters da l'urden Jacques de Milly (1454–61) e Pierre Raymond Zacosta (1461–67) èn vegnids perpetnisads sco patruns da construcziun sin craps da vopna en ils mirs. En la segunda mesadad dal 15avel tschientaner ha il chastè superà plirs assedis osmans. Suenter la capitulaziun dals Johannits a Rhodos, è il chastè vegnì surlaschà senza resistenza als Osmans che n'han betg pli fatg diever d'el. En il 19avel tschientaner èn vegnidas disfatgas parts da la fortezza decadenta ed ins las ha utilisà per la construcziun da la citad da Sými.

Da la fortezza medievala existan anc oz grondas parts dal mir da tschinta, per part dal temp antic, ed in rondel cun curnisch dentada. Causa las devastaziuns en la segunda guerra mundiala, cura che truppas da l'armada germana eran staziunadas qua, pon ins be supponer ch'i deva en quest lieu anc ulteriurs bajetgs medievals da Kastro ed intginas reconstrucziuns succesivas. Sisum il crest, en il lieu da l'anteriura tur da defensiun, stat per exempel dapi 1997 ina pitschna chaplutta.

Sin l'insla datti anc ulteriuras fortezzas dal temp medieval. Da quellas san ins dentant anc betg bler, perquai ch'ina part da l'insla è anc oz zona militara serrada.

Translaziun: Lia rumantscha, Cuira

Losse, Michael : Die mittelalterliche Burg im Chório auf der Ägäis–Insel Sými
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 7. Jahrgang 2002, Heft 4, .

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch