Mittelalter 2003/3
Heft 2003/3    1. Artikel

Punts istorics – un introduziun

par Thomas Bitterli

Punts servan a surmuntar curs d'aua, vals, gea schizunt bratschs da la mar e pussibiliteschan ina colliaziun directa d'in lieu a l'auter. La punt colliescha lieus separads in da l'auter e daventa tras quai in simbol per il barat e la chapientscha vicendaivla. Uschia naschan era numerusas modas da dir ed expressiuns figurativas che sa refereschan a la punt. Ed er sin las bancnotas da l'euro è ella il simbol per la reuniun e la coesiun.

Punts èn dentant en emprima lingia ovras da construcziun en la cuntrada. Ovras remartgablas da l'istorgia culturala suttastattan a la protecziun da la tgira da monuments e ston vegnir examinadas e documentadas da quella, avant ch'ins po prender mesiras da construcziun. Las suandantas contribuziuns dattan invista en l'istorgia da construcziun da duas punts sur la Thur. La contribuziun da Christian Bader s'occupa da las restanzas archeologicas da punts da lain dal temp medieval tardiv e da l'entschatta dal temp modern ad Andelfingen. Las exchavaziuns da salvament èn vegnidas fatgas en connex cun il project da sanaziun da la Thur. L'intent da quel era da sbassar e renaturar il letg dal flum al curs inferiur da la Thur per evitar auas grondas. En la contribuziun da Hansjörg Brem, Daniel Steiner e Monika Zutter vegn preschentada la punt da crap dal temp medieval tardiv a Bischofszell al curs superiur da la Thur. Qua èsi stà necessari da far lavurs da documentaziun per pudair curreger ils «putgads» da sanaziuns anteriuras e salvar il monument architectonic.

Tuttas duas documentaziuns preschentadas en quest carnet davart la punt da la Thur ad Andelfingen e quella a Bischofszell mussan tge infurmaziuns da l'istorgia dals origins che pon anc esser avant maun en la terra, l'aua u er vi da l'ovra sezza. L'exempel dad Andelfingen cumprova ch'ils fastizs da punts pli veglias sa pon mantegnair bain en l'aua ed en il sutterren dal letg dal flum, malgrà che quel sa mida cuntinuadamain. L'expertisa archeologica dals pals e lur dataziun dendrocronologica mussan en pli che las funtaunas scrittas enconuschentas fin ussa davart la punt ston vegnir interpretadas da nov.

Translaziun: Lia rumantscha, Cuira

Bitterli, Thomas : Historische Brücken – eine Einführung
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 8. Jahrgang 2003, Heft 3, .

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch