Mittelalter 2005/1
Heft 2005/1    2. Artikel

Serravalle TI – rapport provisoris da perscrutaziun 2002–2004

par Werner Meyer et Silvana Bezzola

Sin il dies dal grip al nord da Semione èn vegnids construids a ses temp in suenter l'auter dus chastels differents. Quai han cumprovà ils resultats provisoris da l'emprima etappa da perscrutaziun a Serravalle en la Val dal Blegn/TI (2002–2004). L'emprim chastè è vegnì construì enturn il 900 e destruì circa il 1180. Il segund chastè, construì senza referiment a l'emprim, è vegnì erigì il 1220/30. El è vegnì conquistà e destruì il 1402. Il 1928/30 ha l'Associaziun svizra da chastels liberà la ruina da las mischieras tenor las metodas usitadas da lez temp. Durant questas lavurs han ins deplorablamain allontanà era las stresas superiuras da l'orizont d'incendi dal 1402, quai che ha difficultà l'interpretaziun da la stratigrafia a chaschun da las lavurs da perscrutaziun actualas.

Cun las paucas restanzas da mir da l'emprim chastè n'èsi betg stà pussaivel da dissegnar cun absoluta segirezza il plan original dals mirs. Dal segund chastè percunter han ins pudì eruir a moda fitg precisa la structuraziun e la funcziun dals singuls locals. Sper ina latrina cun trais chanals da scul è da menziunar surtut era la tur en furma da mez rudè – il simbol dal chastè – che protegeva probablamain ina funtauna gist ordaifer il mir da tschinta.

Ils numerus chats da stresas che dattan perditga da la colonisaziun sco era da la destrucziun da l'edifizi, han permess da sa far in cler maletg da l'activitad e da la vita quotidiana dals abitants dal chastè. La vasta paletta dals tips da furmas dals chats mussa ils contacts socials ed economics cun il territori alpin (p. ex. vaschs da scalegl per cuschinar) e cun l'Italia dal nord (p. ex. ils magiels e la cheramica da maiolica engravada). Ils chats en la terra mussan ch'il chastè da Serravalle aveva – cuntrari al Castel Grande a Bellinzona cun sia ferma funcziun da defensiun – plitost ina funcziun d'abitar ed ina funcziun administrativa e serviva sco residenza per ina famiglia bainstanta.

Ina segunda etappa da perscrutaziun, medemamain finanziada dal Fond naziunal svizzer per la perscrutaziun scientifica, permetta d'approfundar las infurmaziuns rimnadas fin oz.

Translaziun: Lia rumantscha, Cuira

Meyer, Werner Bezzola, Silvana : Serravalle TI – Vorbericht über die Grabungen 2002–2004
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 10. Jahrgang 2005, Heft 1, .

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch