Mittelalter 2005/3
Heft 2005/3    1. Artikel

La baselgia da St. Laurenzen a Son Gagl

par Maja Widmer

Tar las exchavaziuns en la nav ed en ils edifizis annexs laterals da la baselgia da St. Laurenzen a Son Gagl han ins chattà sper las restanzas da mirs era divers chats archeologics. Per la citad da Son Gagl e la Svizra orientala è la valitaziun da quests chats da gronda muntada, perquai che fin oz èn publicaziuns davart material archeologic medieval fitg raras.

L'emprima giada vegn la baselgia da St. Laurenzen menziunada en in document da l'onn 1166. En quel vegnan citads ils dretgs da chastellan areguard la claustra da Son Gagl inclus las baselgias en possess da la claustra. La baselgia da St. Laurenzen è vegnida construida en tschintg fasas che partan d'ina baselgia-sala cun chor rectangular pli stretg che la nav e mainan sur ina simpla baselgia-sala fin a l'edifizi gotic. Cuntrari a las enconuschientschas da fin ussa n'èsi betg pussaivel da cumprovar che tut ils trais incendis da la citad dal 1215, 1314 e 1418 èn stads il motiv per la destrucziun e la reconstrucziun sequenta da questa baselgia. Mussaments per in incendi datti sulettamain per il segund edifizi: la vasta cotschnur da la part sut dals mirs e dals mirs suandants sco era las mesiras da reparatura. In connex cun l'incendi da la citad dal 1314 n'è betg cumprovabel a basa da las funtaunas istoricas.

La vaschella da St. Laurenzen cumpiglia, sper intginas furmas spezialas e creaziuns extraordinarias, numerus chats represchentativs dal temp medieval tardiv. Uschia han ins chattà en las rasadas dal 14avel tschientaner avnauns a trais chommas, stgadellas, vaschs, chantas cun manetschas e paucs objects singuls sco per exempel ina buttiglia cun fora d'aria ed in aquamanile, in recipient per aua da lavar ils mauns. Interessanta per il 13avel tschientaner è la dataziun da vaschella cun urs en furmas particularas. Sin fundament dals urs pon ins constatar che la vaschella è u vegnida utilisada pir tard u ch'ella aveva ina zunt lunga durada da vita. In auter fatg particular è la mancanza da tscherts vaschs cun urs. L'innovaziun tecnica dal 14avel tschientaner è la glasura.

Las plattinas-cup, che tutgan tar ils vaschs da la cheramica da furn, han survegnî ina furma standardisada dals urs. Las plattinas-stgadella han cuntinuà cun quest svilup. Sper singuls objects da vaider e metal han ins chattà a St. Laurenzen era restanzas da lavetsch. I sa tracta da fragments da set vaschs cun urs da different diameter. Ordadora èn ils vaschs ornads cun musters romboids engravads a maun e cun crennas turnadas.

Translaziun: Lia rumantscha, Cuira

Widmer, Maja : Die Kirche St. Laurenzen in St. Gallen
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 10. Jahrgang 2005, Heft 3, .

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch