Mittelalter 2005/4
Heft 2005/4    1. Artikel

Il chastè da Ripaille

par Louis Necker

Il chastè è situà sin ina peninsla cun in clima favuraivel a la riva meridiunala dal Lai da Genevra. Dapi il pli tard il 13avel tschientaner appreziava la famiglia da Savoia quest lieu sco revier da chatscha. Il 1371 ha cont Amédée VI. laschà bajegiar qua in chastè, dal qual ins na vesa oz nagut pli.

Enturn il 1434 ha duca Amédée VIII. construì là il chastè cun set turs ch'exista anc oz. Confurm a sia vita monastica fitg religiusa correspundeva il bajetg als princips d'ina chartusia: il chastè dal duca è vegnì engrondì cun sis chastels pitschens cun mintgamai ina tur. Uschia aveva mintga chavalier che viveva ensemen cun il duca sia atgna cella en furma da chastè.

Suenter donns massivs durant las guerras da religiun è Ripaille daventà a l'entschatta dal 17avel tschientaner ina chartusia cun in tract da cellas (cellas singulas per ils paders), baselgia e bajetgs per l'administraziun dals bains claustrals. Suenter la Revoluziun franzosa è la claustra vegnida vendida sco bain naziunal al general Dupas, in schuldà da Napoleun. Il 19avel tschientaner han el e ses descendents abità en la claustra ed en il chastè, ma els han laschà ir en ruina ils bajetgs per mancanza da daners.

Il 1892 ha Frédéric Engel-Gros, in industrial alsazian, acquistà il chastè e cumprà plaun a plaun las parcellas da l'anteriur bain per pudair far ordlonder in parc cun ina cuntrada ch'è anc oz da gronda valur. Dal 1892 fin il 1903 èn vegnids reconstruids ils bajetgs dal chastè da Ripaille tenor las infurmaziuns ed ideas existentas da lez temp davart la construcziun da chastels medievala. Il resultat è ina maschaida da jugendstil (Art Nouveau) e neogotica.

Ditg èn ils visitaders ed istorichers s'interessads pli fitg per las parts conservadas dal temp medieval che per las midadas da las epocas sequentas. Pir il davos temp vegn valitada era la «ovra d'art totala» da la sava dal 19ave al 20avel tschientaner, a la quala ils architects William Morris da l'Engalterra u Max Laeuger da la Germania han contribuì bler. Las ultimas perscrutaziuns en connex cun il chastè da Ripaille mussan che l'industrial e ses architect, Charles Schulé, èn suandads las ideas da Violett-le-Duc per la reconstrucziun. Els n'han betg simplamain rebajegià il chastè medieval, mabain han cuntanschì ina novaziun che collia furmas e tecnicas novas cun elements dal passà.

Translaziun: Lia rumantscha, Cuira

Necker, Louis : Neue Forschungen zum Schloss von Ripaille, der ehemaligen Residenz der Savoyer
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 10. Jahrgang 2005, Heft 4, .

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch