Mittelalter 2005/4
Heft 2005/4    2. Artikel

Chastè e citadina d'Yvoire

par Laetitia Toullec

Il temp dal 12avel fin il 15avel tschientaner è stà ina fasa fitg activa per la constituziun da la pussanza en la regiun dal Lai da Genevra. Tut ils signuradis cunfinants sa stentavan da pudair controllar la via da commerzi continentala da l'Italia en la Frantscha, la Burgogna ed en l'Imperi german. Vers la fin dal 13avel tschientaner han las famiglias noblas enturn il Lai da Genevra fatg tut il pussaivel per stabilir ports mercantils e per sa patrunar d'in territori coerent. Ils cunfins nunclers a la riva meridiunala dal Lai da Genevra han chaschunà consequentamain guerras tranter ils conts da Savoia, ils conts da Genevois ed ils signurs da Faucigny.

Cont Amédée V. da Savoia (1285 1323) ha fundà u fortifitgà da lez temp varsaquants lieus al Lai da Genevra: il 1285/85 Morges, il 1295 Rives (sper Thonon), il 1302 La Trouvière ed il 1318 Rolle. Part da questa seria fa era Yvoire che passa il 1306 en possess dals Savoiards tras barat cun il signurs da Compey. Ma era ils adversaris èn stads activs: Gaillard, Lullin, Coppet, Bonne en Faucigny vegnan fundads il medem temp.

Tranter Nernier e Rovorée sa chatta Yvoire al punct il pli avanzà en il lai ed en in lieu avantagius a la riva meridiunala. Qua pudev'ins observar l'entir traffic sin il lai tranter il «lai pitschen» (Coppet, Versoix, Hermance e Genevra) ed il «lai grond» (Rolle, Thonon, Losanna, Evian, Vevey e Chillon); la finamira da quels da Savoia era da limitar l'influenza da Genevra vers l'ost.

Tranter ils onns 1306 e ca. 1316 vegn il lieu Yvoire, uss en possess savoiard, fortifitgà cun mirs e portals (ill. 2 e 3). Ina chasa stabla gia existenta a la testa da la peninsla vegn transfurmada en in chastè il 1324/25 (ill. 1).

Rendaquints dals chastellans savoiards ans infurmeschan oz bain davart la construcziun da la fortificaziun e dal chastè. Sco laina da construcziun vegn menziunada p. ex. ruver, pign e nuscher, sco crappa da bajegiar crap da sablun da molassa (da Nyon e Coppet) e tuf. L'origin dal material e dals mastergnants sa chatta in pau dapertut enturn il lai (ill. 4 e 5).

Dal chastè medieval è restada mo la paraid externa da la tur principala – il 1925 è l'intern da la tur vegnî amplifitgà confortablamain per las relaziuns da lez temp (ill. 1). Schebain che la parcellaziun da la citad medievala è anc bain vesaivla (ill. 6), è restada da la substanza originala mo la Maison Canton – numnada tenor in possessur enturn il 1730: in bajetg en furma da tur en projecziun orizontala da 10 × 12 m cun duas auzadas e cuvert d'in tetg da piramida original (ill. 7).

Translaziun: Lia rumantscha, Cuira

Toullec, Laetitia : Burg und Städtchen Yvoire
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 10. Jahrgang 2005, Heft 4, .

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch