Mittelalter 2005/4
Heft 2005/4    3. Artikel

Chastè Château-Vieux d'Allinges

par Véronique Levert

Sin ina collina auta al sid da Thonon-les-Bains (Haute-Savoie) s'eleveschan duas ruinas da chastè: il Château-Neuf ed il Château-Vieux d'Allinges, domadus strusch 150 m in ord l'auter e separads d'in foss.

In dals dus chastels è documentà l'onn 1073 en il possess da la famiglia d'Allinges; ins suppona ch'i sa tractia d'ina da las residenzas da questa famiglia ch'è stada activa a la riva meridiunala dal Lai da Genevra dapi il 10avel tschientaner. Enturn il 1200 vegn menziunà in Morand sco chastellan savoiard da Château-Neuf ed il 1203 in chastellan dals signurs da Faucigny a Château-Vieux; a l'entschatta dal 13avel tschientaner existivan sin la collina pia dus chastels (da partidas rivalas!).

Retschertgas istoricas ed archeologicas pli recentas èn sa fatschentadas cun il Château-Vieux che consista d'in chastè superiur (pli vegl) e d'in chastè inferiur (pli giuven), cf. ill. 6.

Las parts las pli veglias dal cumplex fortifitgà dateschan dal 12avel tschientaner e cumpiglian in mir da tschinta dentà F7, ina chaplutta F16 e probablamain ina tur grossa (tour maîtraisse, F5), da la quala stat sidretg oz mo anc ina paraid; ils ulteriurs mirs èn anc cuvrids da crappa.

La segunda fasa da construcziun sa lascha eruir il meglier cun agid da las parts conservadas dal mir da tschinta (F5, F7); ils mirs èn vegnids auzads. Las retschas regularas da foras da travs (trous de poutres) sin la vart exteriura inditgeschan l'existenza da curunas (cf. ill. 5).

En la terza fasa da construcziun (13avel tschient.) vegn il chastè amplifitgà cun il chastè inferiur (F19–F27). Il mir da tschinta dal chastè superiur vegn protegî cun in rempar davant (fausse-braie).

En la quarta fasa da construcziun (1. mesadad dal 14avel tschient.) vegn auzà anc ina giada il mir da tschinta dal chastè superiur. En in register d'immobiglias dal 1339 vegn descrit pli exactamain il chastè superiur. En quel sa chattava p. ex. ina aula ed ina camera, pia la sala da residenza e la stanza d'abitar dal chastellan. Per il chastè inferiur vegnan menziunads uigls e clavads, quai ch'è in segn evident per in center d'administraziun signuril.

Translaziun: Lia rumantscha, Cuira

Levert, Véronique : Neue Forschungsergebnisse aus dem Château-Vieux von Allinges
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 10. Jahrgang 2005, Heft 4, .

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch