Mittelalter 2006/1
Heft 2006/1    1. Artikel

Tranter ideals claustrals e basegns aristocrats: La claustra cisterziensa da Kappel

par Roland Böhmer et Peter Niederhäuser

La claustra da Kappel am Albis è vegnida fundada enturn il 1185 dals baruns dad Eschenbach-Schnabelburg. Sco 'claustra da famiglia' era ella la pitga fundamentala sacrala da lur pussanza. La fundaziun ed il sustegn da la claustra exprimivan tant la pietusadad sco era la schientscha da famiglia e da classa, e servivan a la legitimaziun da la pussanza. Fastizs istoric-artistics ed istoric-culturals da la famiglia fundatura èn era vesaivels a Kappel. Durant las exchavaziuns en il claustrigl han ins chattà fragments da la platta da fossa da Berchtold I. (+1236). Ina tavla commemorativa dals Eschenbachs sutterrads en la claustra pendeva anc il 1526 vi d'ina colonna da la baselgia claustrala. Oz è quella conservada en il Museum naziunal svizzer a Turitg. Ed ina da las tschintg fanestras da vaider en la baselgia mussa il giuven Walter dad Eschenbach – conuschent pervi da sia participaziun al regicid dal 1308 sper Windisch.

A partir dal 13avel tschientaner chatt'ins dentant era autras famiglias aristocratas tranter ils benefacturs da la claustra. En l'Anniversari eran registrads passa 90 nums d'aristocrats, a la testa ils signurs da Hallwil (31 nums), suandads dals signurs da Hünenberg (18), Baldegg e Gessler (mintgamai 13), sco era quels da Bonstetten (11). Ils signurs da Hallwil han construî enturn il 1300 ina chaplutta sepulcrala sper il claustrigl. Circa il medem temp han ils baruns da Bonstetten, ils signurs da Baldegg, Uerzlikon e Hünenberg sco era ulteriuras famiglias da chavaliers da la regiun laschà construir fossas da famiglia en la baselgia. Durant la segunda mesadad dal 14avel tschientaner era la claustra da Kappel perquai il center sacral da l'aristocrazia regiunala e possedeva en sia baselgia objects d'art da gronda valur.

Era sche la claustra è vegnida serrada il 1527, chatt'ins en la baselgia parochiala refurmada ed en ils edifizis dal convent che servan oz ad auters intents anc bleras perditgas materialas da questas donaziuns aristocratas.

Translaziun: Lia rumantscha, Cuira/Chur

Böhmer, Roland Niederhäuser, Peter : Kappel ZH – Zwischen klösterlichem Ideal und adligen Bedürfnissen:
Das Zisterzienserkloster Kappel
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 11. Jahrgang 2006, Heft 1, .

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch