Mittelalter 2006/1
Heft 2006/1    2. Artikel

Sutterrada sut l'evla e la vulp – ina fossa da dunnas spectaculara dal 9avel tschientaner ad Elsau

par Werner Wild et Elisabeth Langenegger

Durant las exchavaziuns da salvament ad Elsau ha l'archeologia chantunala da Turitg scuvert duas baselgias dal temp medieval tempriv ed ina fossa dal 9avel tschientaner en il bajetg annex settentriunal da la segunda baselgia. Vi dal skelet da la dunna da circa 42 onns han ins pudî constatar differentas midadas patologicas. In fin sis onns suenter la sepultura è la fossa vegnida averta puspè ed ins ha spustà la chavazza ed auters oss. Cura che la fossa è vegnida cuverta danovamain, han ins mess sur la morta ina platta da crap massiva. Sin quella han ins deponî sin l'autezza dal chau il pe d'ina evla da mar, sin l'autezza da la schanuglia la toppa d'ina vulp. La finala è la fossa vegnida cuverta cun in palantschieu da maulta, uschia ch'ella n'era betg pli vesaivla.

Deponer pes d'animals sin ina fossa era fin uss in act nunconuschent. Duevan ils amulets gidar la paupra olma ad arrivar en l'auter mund? Vulev'ins sa proteger cunter ina morta privlusa che pudeva turnar sco spiert e commetter malfatgs? En l'antica era l'evla l'accumpagnadra da las olmas ed en l'iconografia cristiana è ella il simbol da la levada. La vulp dentant, l'animal malizius, aveva in patg cun il diavel. Probablamain avevan ils pes d'animals ed era ils ulteriurs acts pliras muntadas ed exprimivan uschia era il dilemma dals umans da lez temp en connex cun ils morts.

Translaziun: Lia rumantscha, Cuira/Chur

Wild, Werner Langenegger, Elisabeth : Unter Adler und Fuchs begraben – Ein aufsehenerregendes Frauengrab des 9. Jahrhunderts in Elsau
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 11. Jahrgang 2006, Heft 1, .

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch