Mittelalter 2007/2
Heft 2007/2    3. Artikel

Prada: in abitadi abandunà en il conturn da Bellinzona

par Giuseppe Chiesi

En il decurs da la colonisaziun e cultivaziun dal terren durant il temp autmedieval èn vegnids construids sin las terrassas ed ils givels da las costas da la val enturn Bellinzona pitschens abitadis sumegliants a vitgs. Els èn dentant vegnids abandunads puspè a l'entschatta dal temp modern. Oz èn els anc enconuschents surtut pervi da lur baselgias che han survivî il process d'abandunament. Enturn la baselgia da s. Girolamo a l'ost sur Ravecchia sa gruppeschan las restanzas dal vitg da Prada da pli baud. Per la perscrutaziun ed il mantegniment dal vitg è sa constituida il 1974 l'associaziun da promoziun "Nümm da Prada".
L'abitadi da Prada s'extenda en direcziun nordvest-sidost sin ina lunghezza da var 250 meters tranter duas vals. Las restanzas da mir mantegnidas sa chattan en stadis da decadenza differents. Entant ch'ins vesa en il sid da la baselgia mo anc ils mirs da fundament, stattan en il nord da la baselgia per part anc ruinas da plirs plauns da var dus tozzels edifizis. En las funtaunas conservadas vegn Prada menziunà dapi la fin dal 14avel tschientaner. Il vitg fascheva part da Bellinzona ed il 1440 èn vegnids delegads represchentants da Prada ad ina radunanza a Bellinzona. Il december 1583 abitavan anc var 40 famiglias en il vitg, ma paucs decennis pli tard - a l'entschatta dal 17avel tschientaner - èn las chasas vegnidas abandunadas.

Translaziun: Lia rumantscha, Cuira/Chur

Chiesi, Giuseppe : Prada: un insediamento bellinzonese abbandonato
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 12. Jahrgang 2007, Heft 2, 49 - 54.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch