Mittelalter 2007/2
Heft 2007/2    4. Artikel

Gorduno: la collina dal chastè

par Giuseppe Chiesi

Las retschertgas archeologicas dal "Ufficio beni culturali" il 1995 sin la collina da Gorduno, nua che sa chatta la baselgia da s. Carpoforo e s. Maurizio, han purtà novs resultats davart l'istorgia da la baselgia e da las fortezzas medievalas en il territori da Bellinzona.

Questa collina grippusa sa chatta al nord da la stretga natirala da Bellinzona, directamain sper la A2. La buna posiziun da la collina permetteva da controllar efficaziamain las vias da traffic vischinas che manavan vers ils Pass dal Gottard, Lucmagn e San Bernardin. En il temp medieval sa chattava qua era il cunfin tranter Bellinzona, che appartegneva a Como, e las valladas superiuras dal Tessin, ch'eran en possess milanais.

Durant las retschertgas èn vegnidas a la glisch las restanzas d'in mir da tschinta dal temp medieval tempriv e quellas d'ina tur. La scuverta d'ina fossa cun ina spada agiuntada renviescha a la preschientscha da guerriers langobards, ch'èn documentads a Bellinzona gia en il 6avel tschientaner. La tur construida enturn l'onn 1000 stat forsa en connex cun l'arrivada da las "famiglie capitaneali", infeudadas da l'archuvestg da Milano cun bains e dretgs en la regiun dal Verbano.

L'emprima menziun documentada d'in chastè-fortezza "castrum de Nioscha" datescha da l'onn 1133. Il chastè-fortezza era en possess d'in rom pussant dals Orelli-Magoria che appartegnevan a las famiglias noblas en la regiun da Locarno. Quellas han laschà construir sin la collina ina baselgia pli gronda ch'è vegnida consecrada da l'uvestg Ardizzone da Como l'onn 1132. Cunquai che la campagna d'exchavaziun è sa concentrada mo sin la part interiura da la baselgia e sin il plaz-baselgia, ha mo ina pitschna part da la collina pudî vegnir examinada.

Ulteriuras restanzas da mirs, per part anc vesaivlas oz sin la spunda terrassada, han pudî vegnir examinadas pli detagliadamain grazia ad ina mesiraziun topografica da l'onn 2000 sut la direcziun da Rudolf Glutz. I sa tracta probablamain da las restanzas da dus mirs da tschinta che circumdavan la collina cumplettamain. Perquai èsi da supponer ch'il chastè-fortezza cumpigliava en il 13 e 14avel tschientaner in cumplex pli grond cun edifizis che sa gruppavan enturn la baselgia.

La destrucziun dal chastè-fortezza stat probablamain en connex cun ils eveniments politics dal 14 e 15avel tschientaner, cura ch'ils Milanais sut il domini dals Viscontis han conquistà quests territoris. En il 14avel tschientaner han ils Viscontis surdà il chastè-fortezza ad Albertone da Sax-Mesauc. Paucs onns pli tard è la relaziun tranter ils Viscontis ed ils Saxs sa pegiurada. Suenter la mort dal duca Gian Galeazzo Visconti l'onn 1402 è la citad da Bellinzona vegnida occupada da la famiglia Sax, che ha alura vendî la citad il 1419 als burgais d'Uri e Sursilvania. Suenter la sconfitta dals confederads ad Arbedo (1422) èn quests territoris vegnids per in temp puspè sut il domini dals Milanais. Pussaivel èsi era ch'ina rotscha da confederads ha sin ses return occupà il chastè-fortezza da Gorduno. Probablamain han ils Milanais alura pauc temp pli tard destruî definitivamain il chastè-fortezza.

Translaziun: Lia rumantscha, Cuira/Chur

Chiesi, Giuseppe : Gorduno: la collina del castello
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 12. Jahrgang 2007, Heft 2, 55 - 59.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch