Mittelalter 2007/2
Heft 2007/2    5. Artikel

Museo del Territorio: in project innovativ per il chantun Tessin

par Marco Molinari et Filippo Rampazzi et Rossana Cardani Vergani

Il Tessin è in dals paucs chantuns svizzers che posseda dus objects inscrits en il register dal Patrimoni mundial da l'UNESCO: sco bain cultural ils chastels-fortezza da Bellinzona e sco bain natiral ils fossils dal Monte San Giorgio. Sin fundament da quest fatg vegn il project Museo del Territorio promovî da las autoritads chantunalas en collavuraziun cun la citad da Locarno ed il Locarnese.

L'idea anc betg concretisada è d'unir sut in sulet tetg (organisatoric ed architectonic) il patrimoni archeologic rimnà durant bundant dus tschientaners, il qual è oz sparpaglià en l'entir chantun ed era ordaifer quel. Ultra da quai duain vegnir schliads ils problems da spazi actuals dal Museum chantunal da la natira a Lugano. Il 2002 è vegnida instituida ina gruppa da lavur coordinada da Marco Molinari.

In tal project porscha differentas pussaivladads che duain vegnir menziunadas qua curtamain: - dal puntg da vista politic porscha il project in'avischinaziun unitara a la tematica da la cuntrada, en la quala la natira, l'uman ed il territori represchentan fatschas differentas da la medema realitad; - dal puntg da vista cultural permetta quest project da valitar ils objects archeologics. L'enconuschientscha dal passà gida a dar ina resposta a las dumondas da l'avegnir; - dal puntg da vista socio-economic pussibilitescha il project da transfurmar il museum da collecziun (museo-vetrina) en in'organisaziun da tetg che coordinescha las activitads existentas u futuras e las sviluppa vinavant, era concernent novas plazzas da lavur.

Ils aspects da la scienza natirala e da l'archeologia èn duas varts dal medem tema fundamental, numnadamain da la cuntrada ch'è sa sviluppada sur millennis tras l'interacziun da l'uman e da la natira - da la furmaziun dals pli vegls craps en il chantun (avant bundant 500 miu. onns), a las emprimas fasas da la colonisaziun umana suenter la davosa epoca glaziala (avant ca. 10'000 onns) fin a las transfurmaziuns profundas da la cuntrada durant ils davos tschientaners (runcada, agricultura, allevament d'animals e construcziun da chasas).

Malgrà che l'istorgia natirala, l'archeologia e l'istorgia da la cuntrada han lur atgnas caracteristicas e particularitads, vegnan questas trais disciplinas reunidas sut il tetg dal Museo del Territorio. La sedia dal museum vegn endrizzada a Locarno, damanaivel dal chastè-fortezza e dal rivellino. Sper l'administraziun e la coordinaziun stattan a disposiziun qua era meds didactics moderns (multimedia) e maletgs.

Il museum ademplescha sis incumbensas: retschertga (cun publicaziuns correspundentas), conservaziun, documentaziun, derasaziun (exposiziuns), scolaziun e cussegliaziun. El duai pudair satisfar a tut ils basegns.

Translaziun: Lia rumantscha, Cuira/Chur

Molinari, Marco Rampazzi, Filippo Cardani Vergani, Rossana : Museo del territorio: un progetto innovativo per il cantone Ticino
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 12. Jahrgang 2007, Heft 2, 60 - 65.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch