Mittelalter 2007/3
Heft 2007/3    2. Artikel

Il chastè-fortezza d´Unterhof a Diessenhofen -
l´istorgia da recepziun moderna d´in chastè medieval

par Christian Coradi

L´onn 2003 ha la "Divisione della pianificazione territoriale", sin dumonda dal "Servizio Inventario dell´Ufficio dei beni culturali" da Bellinzona, approvà in credit per ina cataloghisaziun sistematica da las fortezzas en il chantun Tessin. La finamira da questa lavur è stada da registrar d´ina vart las structuras anc identifitgablas e da l´autra vart da las proteger a moda adequata.

Las funtaunas scrittas sa refereschan en general ad objects enconuschents (p.ex. Castello Visconteo da Locarno, ils chastels-fortezza da Bellinzona, Serravalle etc.). Per in´emprima cataloghisaziun èn ins sa basà surtut sin singulas publicaziuns, sco p.ex. sin la charta dals chastels-fortezza da la Svizra (1985), ils texts da Clemente (1974) e.a. Grazia a la collavuraziun da Stefano Vassere han ins pudî integrar era infurmaziuns da la toponomastica. Dals toponims èn vegnids resguardads qua surtut las denominaziuns da dus tips da fortificaziuns: "castello" e "torre". En tut èn vegnids inventarisads passa 400 objects, distribuids sin 237 vischnancas. In grond dumber da tals toponims na renviescha dentant betg adina a l´existenza d´ina fortificaziun. Las fortezzas sa laschan localisar oz oravant tut en il conturn dals abitadis u en posiziuns elevadas. Numerus da quels objects èn oz mo pli identifitgabels sin fundament da paucas restanzas da mirs. Auters èn vegnids transfurmads en il decurs dal temp, uschia ch´i fiss mo cun retschertgas archeologicas pussaivel da metter questas construcziuns en il dretg context.

Cunquai ch´ina documentaziun precisa manca, èsi difficil da far ina classificaziun tipologica precisa. Ins po eruir surtut duas categorias: las turs isoladas e las fortificaziuns pli grondas che cumpiglian ina tur, in mir da tschinta ed edifizis interiurs. Las turs isoladas cun in plan orizontal quadratic, sco per exempel la Torraccia a Barbengo u la Torre Alta a Lodrino, èn fitg derasadas. Quai che pertutga las turs radundas è enconuschent mo in exempel, la tur da Campo Blenio. Autras turs èn vegnidas transfurmadas en il decurs dal temp en turs-baselgia (p.ex. a San Quirico) u integradas en bajetgs pli moderns (Torre dei Nobili a Prato Leventina). Tar ils implants pli gronds tutgan oravant tut ils chastels-fortezza che sa cumponan da plirs bajetgs (Castello di Bironico, Mezzovico-Vira e Castel San Pietro), dals quals existan anc restanzas da mirs pli grondas.

Las autras fortificaziuns sa laschan sutdivider en duas gruppas: in´emprima gruppa cumpiglia ils cumplexs, dals quals ins ha pudî eruir la surfatscha totala sin fundament d´ina retschertga scientifica (Castello di Torricella-Taverne, Castello di Caroggio, Castellaccio di Melano, Castello di Sta. Maria a Giornico, Castello di Pontegana etc.). A la segunda gruppa appartegnan las fortificaziuns, da las qualas èn vegnidas documentadas mo singulas parts dal mir da tschinta u dals edifizis interiurs (Casletto di Bedano, Castellaccio di Barbengo, Castello di Cresta etc.). Tar ils implants pli gronds ston ins era quintar quels che n´avevan en il passà betg mo ina funcziun da defensiun (tur ed abitadis da Redde a Vaglio, "Castello" di Tremona). Ils toponims sa refereschan era a cumplexs preistorics (Balladrum ad Ascona, Castelvedro a Barbengo, Tegna e Monte Barro a Torricella-Taverne).

Translaziun: Lia rumantscha, Cuira/Chur

Coradi, Christian : Der Unterhof in Diessenhofen -
die moderne Rezeptionsgeschichte einer mittelalterlichen Burg
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 12. Jahrgang 2007, Heft 3, 89 - 112.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch