Mittelalter 2007/4
Heft 2007/4    3. Artikel

Las salas dals palazis e dals chastels durant l´Imperi dals Staufers - la reconstrucziun, il mobigliar ed il diever da la sala

par Judith Bangerter-Paetz

La sala gronda è l´edifizi da represchentaziun principal d´in chastè u d´in palazi. Durant il temp dals Staufers avevan quels edifizis dus u trais plauns ed eran caracterisads dad ina u pliras salas. Ils edifizis da sala han normalmain ina furma clera; els èn lungs, per il pli rectangulars, cun access da la vart lunga. Pli rars èn ils edifizis che cuntegnan sulettamain salas; las salas sa chattan en quel cas ina sur l´autra e cuvran l´entir plaun. Pli savens datti edifizis cumbinads; ina u pliras salas sa chattan en il plaun sura u en ils dus plauns sura e sut il tetg sa chatta il spazi d´abitar.

Las salas dal temp dals Staufers avevan per regla in tschiel sura plat da travs da lain, che vegniva savens purtà entamez dad ina retscha da pilasters cun chavret. Ils pilasters eran per part elavurads a moda fitg decorativa. Il palantschieu da las salas era mintgatant fatg da maulta, pli savens da plattas da terracotga glasadas ed ornadas che pudevan era esser tschentadas sco mosaic en diversas colurs.

Sco stgaudament en las salas han ins savens chattà chamins, pli darar pignas da plattinas ch´èn surtut cumprovadas mo tras stgavaments archeologics. En paucs chastels e palazis avevan las salas dal plaunterren in stgaudament cun aria chauda (sala d´enviern), entant che las salas survart n´eran betg stgaudadas (sala da stad).

Las fanestras da las salas eran per regla decoradas cun ina ornamentica ritga e decoraziuns plasticas. Tschertas avevan era sezs da la vart per dar al contemplader ina vista patgifica sin la cuntrada, en la curt dal chastè ed en la sala. Sper ils barcuns da lain per serrar las fanestras, devi probablamain era gia vaider per las fanestras. En singuls cas è il vaider vegni chattà tar stgavaments archeologics. Stgalas externas manavan als portals da las salas cun profilaziun simpla u dubla. L´elavuraziun dals portals tanscheva dad artgs en furma da traifegl fin ad ina decoraziun plastica fitg ritga.

Las paraids da las salas eran per part coluradas sco crappa u smaultadas e cuvridas cun colur u cun picturas. Per ils roms da las fanestras e dals portals, per ils bists dals pilasters, per ils capitels e chamins vegnivan savens duvrads era differents materials da crap e differentas colurs en la medema sala. En divers edifizis han ins chattà salas profanas cun purtrets da paraid scenics. Savens mussava la pictura en ils edifizis profans dal temp dals Staufers ditgas eroicas da chavaliers.

Ins suppona che la funcziun principala resp. il diever principal da las salas en il plaun sura eran occurrenzas festivas sco banchets, retschaviments sco era acts giuridics, p. ex. cussegliaziuns e ceremonias. Funtaunas incontestablas davart la funcziun da las salas, datti pir a partir dal temp medieval tardiv.

Translaziun: Lia rumantscha, Cuira/Chur

Bangerter-Paetz, Judith : Saalbauten auf Pfalzen und Burgen im Reich der Staufer - zur Rekonstruktion, Ausstattung und Nutzung des Saales
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 12. Jahrgang 2007, Heft 4, 143 - 159.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch