Mittelalter 2001/4
Heft 2001/4    2. Artikel

In "trubadur" sin il chastè da Ringgenberg: il barun Johann I e ses chants

par André Schnyder

Al barun Johann I da Ringgenberg èn deditgadas trais paginas text ed ina miniatura en il codex Manesse (14avel tschientaner). El n’appartegna dentant betg als trubadurs u "Minnesänger", mabain a la categoria dals "Spruchdichter". Il "Minnesang" era resalvà als chantadurs aristocrats, entant che l’uschenumnada "Spruchdichtung", medemamain chantada, vegniva per il solit recitada da chantadurs che n’appartegnevan betg a l’aristocrazia. Quests chantadurs gudagnavan lur paun da mintgadi cun viagiar da chastè a chastè, d’ina festa a l’autra, u d’ina citad a l’autra, recitond lur agens texts u quels dad auters.

En las 17 strofas da Johann da Ringgenberg, mantegnidas enfin oz, chattain nus elements multifars dal pensar dal poet. Intgins texts han in cuntegn religius, auters s’occupan da dumondas eticas. La dunna vegn ludada en divers texts sco creatira divina. Duas giadas dovra el era il simbol da la roda da fortuna. En general han ils texts in cuntegn didactic.

Igl è interessant da constatar che Johann da Ringgenberg sa deditgava, malgrà sia derivanza nobla, a l’uschenumnada "Spruchdichtung", la quala recitavan normalmain mo persunas che n’appartegnevan betg a l’aristocrazia. Forsa intervegnin nus grazia a quest gener litterar dapli davart ils fastidis che accumpagnavan Johann en ses mintgadi, probablamain savens stentus, sco pitschen signur feudal en il cumbat cunter quels da Habsburg e la citad da Berna.

(Lia Rumantscha, Cuira/Chur)

Schnyder, André : Ein "Minnesänger" auf Burg Ringgenberg: Freiherr Johannes I. und seine Sangsprüche
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 6. Jahrgang 2001, Heft 4, 13 - 15.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch