Mittelalter 2008/1
Heft 2008/1    1. Artikel

La ruina dal chastè da Ringgenberg La perscrutaziun archeologica da construcziun e la restauraziun dal 2006-2008

par Daniel Gutscher

Cun integrar il 1670/71 la baselgia en il chastè medieval è l’areal da Ringgenberg daventà in dals pli attractivs ensembles e la plaiv evangelic-refurmada è s’avanzada per uschè dir ad ina "chastellana". Cunquai che l’ultima sanaziun pli cumplessiva da la miraglia dal chastè è succedida ils onns 1946-49, n’èsi betg stà surprendent ch’ins ha stuì far lavurs da conservaziun pli extendidas: en blers lieus era la maulta sa smagliada da tala maniera, ch’igl existiva in privel acut da crudadas da crappa. Las lavurs da conservaziun èn succedidas a basa da perscrutaziuns archeologicas da construcziun durant las stagiuns pli miaivlas dal 2006 e 2007. La construcziun d’ina stgala a l’intern dal chastè ha augmentà l’attractivitad era per in public pli vast da persunas interessadas. Las lavurs èn vegnidas sustegnidas principalmain da la Confederaziun, dal chantun, dal fond da lottaria, da la plaiv e da numerus sponsurs publics e privats.

Ina da las scuvertas las pli impurtantas concerna la structura dal chastè. Ins ha constatà ch’il chastè, construì enturn il 1240, correspundeva davent da l’entschatta al plan orizontal da pli tard, e ch’el è vegnì amplifitgà enturn il 1300. En il plaun sura da la tur han ins integrà ina sala ch’era la suletta stanza cun ina funcziun precisa. Tipologicamain n’appartegna la tur perquai betg a las turs residenzialas, mabain a la gruppa dals edifizis cun sala, che han in fundament en furma da tur ed in access exteriur direct. La reconstrucziun d’ina galaria che circumdava la sala dat in’infurmaziun interessanta davart la moda d’endrizzar ina sala da festa en in chastè. D’impurtanza particulara èn era las nischas en la fatschada exteriura. Lur funcziun pudess vegnir attribuida a la chatscha da falcuns.

(Lia Rumantscha, Cuira/Chur)

Gutscher, Daniel : Die Burgruine Ringgenberg Zur bauarchäologischen Untersuchung und Restaurierung 2006–2008
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 13. Jahrgang 2008, Heft 1, 1 - 12.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch