Mittelalter 2008/4
Heft 2008/4    1. Artikel

Il chastè da Birseck sper Arlesheim BL – residenza da l’uvestg, chastè da terratrembel e sedia da la podestataria

par Reto Marti

La ruina dal chastè da Birseck sper Arlesheim BL è vegnida segirada a moda cumplessiva, suenter che parts dal mir da tschinta eran sballunadas. Sco basa ha servì in′analisa detagliada da la substanza architectonica fatga da l′Archeologia dal chantun Basilea-Champagna. Durant questas lavurs - sco era durant las sanaziuns sequentas - han ins empruvà da midar uschè pauc sco pussaivel las structuras originalas. Per il medem motiv han ins desistì da far sondagis en il terren.

Malgrà questas restricziuns èsi stà pussaivel d′obtegnair datas impurtantas davart l′istorgia da construcziun dal cumplex: il plan orizontal dal chastè cun il mir da tschinta e la tur radunda va enavos sin il temp da l′uvestg Lüthold da Basilea. Tenor datas dendrocronologicas han ins cumenzà a construir il chastè enturn il 1243/44. Il terratrembel da Basilea dal 1356 ha destruì ina gronda part dal cumplex. La tur para d′esser il sulet element ch′è vegnì donnegià mo levamain. Tenor ina singula data dendrocronologica ha gì lieu la reconstrucziun enturn u curt suenter il 1373: quel onn ha l′uvestg dà en pegn il chastè per mancanza da daners als signurs da Ramstein sut la cundiziun d′al reconstruir. Ils signurs da Ramstein han impundì ils onns sequents la summa considerabla dad 800 flurins per ina reconstrucziun ch′ins po datar a moda vaira exacta. Il 1435 ha Johann von Fleckenstein cumprà liber il chastè che ses successur Friedrich zu Rhein ha puspè modernisà. Il chastè è daventà la sedia da la podestataria, ma savens serviva el era sco residenza dals uvestgs. L′istorgia da construcziun pli recenta vegn documentada meglier tras vistas contemporanas dal chastè che tras perscrutaziuns limitadas da la structura architectonica. Il 1679 ha il chapitel catedral da Basilea dischlocà ad Arlesheim, in pass che ha franc anc ina giada augmentà la valur dal chastè da Birseck. Ma l′onn 1762 n′ha il podestat Franz Karl von Andlau betg pli vulì star en il chastè decadent. Durant ils embrugls da la Revoluziun è il cumplex gia bandunà daventà la victima da las flommas ed è vegnì utilisà suenter sco crappera. Varsaquants onns pli tard è la ruina vegnida integrada en il parc da la "Eremitage".

(Lia Rumantscha, Cuira/Chur)

Marti, Reto : Die Birseck bei Arlesheim BL - Bischofsresidenz, Erdbebenburg, Landvogteisitz
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 13. Jahrgang 2008, Heft 4, 137 -158.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch