Mittelalter 2009/2
Heft 2009/2    1. Artikel

Il "Grosses Höchhus" a Steffisburg
La perscrutaziun archeologica d’ina sedia patriziana da la gotica tardiva

par Armand Baeriswyl et Jürg Schweizer

A l’ur da l’ost da la vischnanca Steffisburg, lunsch davent da la baselgia, sa chatta la gruppa d’edifizis "Grosses Höchhus" e "Kleines Höchhus". Quest num han ils dus edifizis survegnì, perquai ch’els eran en il 16avel tschientaner pli auts che la baselgia. Il "Grosse Höchhus" è vegnì sanà a moda cumplessiva ils onns 2006 fin 2008 ed è cun quella occasiun vegnì perscrutà archeologicamain.

Da la construcziun oriunda, erigida en il temp medieval tardiv, èn mantegnids fragments en il terrain ed en ils mirs da l’edifizi dad oz. Il 1415(d) è vegnida construida en la part dal sidost dal chastè en ruina ina chasa da dus plauns en furma quadratica. Cun questa furma da construcziun tipica per las famiglias arrivisticas che regnavan la citad Berna, mussavan ellas lur pussanza politica ed economica.

Ina segunda transfurmaziun cumplessiva sa lascha datar cun la metoda dendrocronologica al temp dal 1526 fin il 1530: Il stattalter bernais Peter Surer, in arrivist da la champagna, ha construì l’edifizi dad oz cun trais plauns e cun in tetg a quatter alas fitg aut. Da quests tetgs colossals èn vegnids erigids savens en il 16avel tschientaner. Lur intent n’era però betg da servir sco volumen da magasin, analog a las grondas chasas da purs, ma da represchentar il status social da las famiglias bainstantas. Probablamain han quels tetgs fatg gronda impressiun als contemporans che vivevan en chasas modestas.

Cun la mort da la famiglia proprietaria en il 16avel tschientaner tardiv è il "Höchhus" pervegnì a la vischnanca. Ella n’ha betg chattà ina moda adequata per utilisar quest edifizi cun ina structura talmain patriziana. Ins ha dentant gì in’idea: il 1592(d) è l’edifizi vegnì transfurmà en ina chasa d’abitar per pliras partidas cun bajegiar en ulteriurs palantschieus e pliras lautgas d’access. En quella chasa han chattà alloschi schurnaliers e povers; la chasa patriziana è daventada in asil.

En quest stadi ha il "Grosse Höchhus" survivì fin l’onn 1946, cura ch’ins ha integrà in restaurant en il plaunterren. La sanaziun la pli recenta dal 2006 fin il 2008 ha restituì al Höchhus sia dignitad patriziana da la gotica tardiva.

(Lia rumantscha, Cuira/Chur)

Baeriswyl, Armand Schweizer, Jürg : Das Grosse Höchhus in Steffisburg.
Die archäologische Untersuchung eines spätgotischen Patriziersitzes
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 14. Jahrgang 2009, Heft 2, 33 - 41.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch