Mittelalter 2009/4
Heft 2009/4    1. Artikel

Il chastè da Rouelbeau, ina construcziun da lain dal temp medieval tardiv en la vischinanza da Genevra

par Jean Terrier et Michelle Joguin Regelin

Las ruinas dal chastè da Rouelbeau sper Meinier GE è ina da las raras perditgas da l’architectura da chastels dal temp medieval en il territori da Genevra. Ellas èn vegnidas integradas en la glista dals emprims sessanta monuments classifitgads dal chantun da Genevra il 1921.

En il rom da la renatiralisaziun dals curs da las auas en il chantun da Genevra, han ins lantschà in vast project che cumpigliava era las funtaunas da la Seymaz, il flum che cula aval sper la ruina. En quest connex han ins transfurmà in grond sectur da terren al sidost da la fortezza en in lai artifizial, dal qual è sa furmà in biotop palidus.

Questa renaschientscha dal terren palidus ha intimà il Servetsch archeologic chantunal da Genevra (SCG) d’examinar il terren a moda cumplessiva. Sco ch’i para han ils architects dal temp medieval numnadamain prendì resguard sin il conturn palidus cun eriger il chastè da Rouelbeau; els han furmà ina collina artifiziala. Il project da perscrutaziun ha cumenzà la primavaira dal 2001. Ses scopo è da perscrutar l’istorgia da construcziun dal cumplex e da conservar la ruina sin basa da las novas enconuschientschas.

Gia suenter curt temp han las perscrutaziuns archeologicas pussibilità scuvertas extraordinarias. Ins ha numnadamain chattà la cumprova per ina vasta construcziun da lain sut las ruinas dal chastè da crap ch'era zuppada sut ina vegetaziun spessa. Ils resultats da las perscrutaziuns sin quest plaz permettan impurtantas enconuschientschas novas en connex cun la construcziun da lain dal temp medieval (14avel tschientaner). Ultra da la furma dal bajetg e da la tecnica applitgada per la construcziun è era la dumonda areguard il curt temp da construcziun da grond interess. Ins ha numnadamain utilisà material ch’ins pudeva explotar senza grondas fadias en il conturn vischin u pli lontan.

Dal punct da vista scientific èsi impurtant da far attent ch’i fiss stà illusoric da far perscrutaziuns archeologicas sin la collina da Rouelbeau senza resguardar ils resultats en collecziuns d’archiv e las exchavaziuns fatgas en lieus sumegliants. En nossa lavur sin la collina da Rouelbeau ans avain nus pelvaira laschà diriger da las ipotesas fatgas en auters lieus. Uschia avain nus pudì far ina scuverta excepziunala d’in orizont da colonisaziun da l’emprima part dal 14avel tschientaner, conservà en ina profunditad nunusitada, nua che fastizs da construcziuns da lain èn fitg grevs da scuvrir. Quests fatgs duessan vegnir considerads era per auters tips da construcziun, sco per exempel per baselgias da lain che vegnivan medemamain construidas – tenor las funtaunas scrittas – en la regiun da Genevra enfin il temp medieval tardiv.

Quest project da studi, da restauraziun e d’utilisaziun ch'è vegnì cumenzà l’onn 2001 e che vegn cuntinuà ils onns sequents regularmain, dovra anc ulteriuras etappas per arrivar ad ina fin cuntentaivla. La finala èsi ina represchentaziun cumplessiva d’in patrimoni tant cultural sco natiral, confurm ad in concept da svilup duraivel, che nus vulain offrir a la publicitad; ad in public che emprenda da respectar ses ambient cun ir a la scuverta da quel.

(Lia Rumantscha, Cuira/Chur)

Terrier, Jean Joguin Regelin, Michelle : Le château de Rouelbeau - une bâtie en bois édifiée au bas Moyen Age dans les environs de Genève
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 14. Jahrgang 2009, Heft 4, 133 - 134.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch