Mittelalter 2010/2
Heft 2010/2    2. Artikel

La ruina dal chastè da Benzigen sper Schwanden (GL) – ils sondagis dal 2005 e 2008

par Thomas Bitterli

La ruina dal chastè da Benzigen sa chatta en il nord da Schwanden (GL) sin in sparun cuvert da guaud sur la via da la val e la Linth. Dal chastè ves’ins oz anc in chantun da mir che consista da gronds blocs (miraglia da megalits) e d’ina colliaziun dal chantun realisada cun gronda premura.

L’enconuschent cronist glarunais Aegidius Tschudi (1501–1572) attribuescha quest chastè als baruns da Schwanden e menziunescha plirs commembers da questa famiglia che duain esser stads impurtants per l’istorgia glarunaisa. La perscrutaziun da l’istorgia ha dentant scuvert en il fratemp diversas sfalsificaziuns en l’ovra da Tschudi. Dals baruns da Benzigen p.ex. è restà sulettamain in «Heinrich von Schwanden» (1240) senza titel da noblezza.

La finamira era damai d’eruir la vegliadetgna dal chastè da Benzigen e da skizzar ses plan orizontal oriund, e quai cun agid d’in sondagi l’onn 2005 e d’in l’onn 2008. A basa da questas duas examinaziuns pon ins datar il temp da construcziun dal chastè vinavant mo vagamain en il 13avel tschientaner, perquai ch’ins n’ha chattà nagins objects databels. Persuenter è vegnida a la glisch ina tur imposanta d’ina surfatscha da basa da 18 x 18 m ed in mir da tschinta da passa 90 m lunghezza. La ruina da la tur è anc bundant 4 m auta e cuverta da duas varts cumplettamain cun material da la miraglia.

La fin dal 19avel tschientaner ha il possessur da terren da lez temp transfurmà a l’engronda l’areal dal chastè. El ha laschà allontanar ils mirs da l’avantchastè e deponer il material sper la tur. Suenter ha el disfatg la part anc mantegnida excellentamain da la tur e cuvert cun terratsch il mut da material resultà da quest’acziun.

La restanza massiva da la tur ed il grond mir da tschinta laschan supponer ch’il chastellan aveva forsa tuttina ina tscherta impurtanza e che las infurmaziuns dad Aegidius Tschudi na pon malgrà tut betg esser uschè sbagliadas. Ulteriurs sondagis che pudessan dar ina resposta a questas dumondas èn planisads.

Lia Rumantscha (Cuira/Chur)

Bitterli, Thomas : Burgruine Benzigen bei Schwanden (GL) – Ergebnisse der Sondierungen 2005 und 2008
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 15. Jahrgang 2010, Heft 2, 62 - 80.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch