Mittelalter 2010/2
Heft 2010/2    3. Artikel

Ils mirs da la Letzi da Näfels e Beglingen

par Jakob Obrecht

Ils mirs da la Letzi da Näfels e Beglingen èn vegnids construids suenter l’onn 1351. Al nord da Näfels bloccavan els en la planira da la val da l’aual Rauti l’access al chantun da Glaruna; la part da Beglingen era situada a la via d’access da Sargans vers Glaruna.

L’enconuschenta battaglia da Näfels ha gì lieu il 1388 a la Letzi da Näfels, uschia che las ruinas da mir han adina gì ina tscherta impurtanza per las abitantas ed ils abitants da la Glaruna. Il 1970 è vegnida examinada archeologicamain ina part dal mir da la Letzi sper la baselgia ed il monument da la battaglia e silsuenter reconstruida. L’onn 2009 è il mir da la Letzi vegnì rendì visibel en in auter lieu e documentà.

Il mir da la Letzi cun ina profunditad da radund 1,2 m è da la vart da l’inimi (vers nord) var 3 m aut e consista da gronds craps. Da la vart da l’ami (vers sid) era il mir rinforzà cun terratsch e disponiva d’ina passarella da defensiun. Ils ultims sondagis mussan che la curuna dal mir è vegnida reconstruida pliras giadas. Tge onn che questa reconstrucziun è succedida, n’han ins però betg pudì eruir.

Il mir da la Letzi è tacticamain situà en il dretg lieu en la val, uschia ch’ils inschigners da fortezza dal 20avel tschientaner han construì lur nova lingia da defensiun per proteger la Val da la Linth mo circa 100 m davent da quel en direcziun nord. Da la lingia da defensiun ves’ins oz anc il foss antitanc (construì il 1941), plirs foss d’infantaria e las balestreras da las ovras d’artigliaria da Niederberg e Beglingen (tuttas duas prontas per il tir l’onn 1943).

Lia Rumantscha (Curia/Chur)

Obrecht, Jakob : Die Letzimauern von Näfels und Beglingen
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 15. Jahrgang 2010, Heft 2, 81 - 86.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch