Mittelalter 2010/3
Heft 2010/3    1. Artikel

«scriptor comitis» – chastè – activitad da construcziun?
Ipotesas da lavur a maun dad intgins exempels («et alii quamplures!») da la Svizra tudestga

par Werner Wild

Il cuntegn dals documents dal temp medieval è redigì tenor ina structura fixada. Ils documents cumpiglian per regla in’introducziun, ina descripziun da l’act giuridic, l’enumeraziun da perditgas, la data ed il lieu d’emissiun sco er ils sigils che pendan londervi. Sch’ils lieus d’emissiun vegnan numnads, alura èn quai vitgs, citads, chastels, claustras e baselgias. Cun quai sa tschenta la dumonda da la qualitad da dretg e da la rolla dals lieus tschernids, spezialmain dals chastels.

Perscrutaziuns da documents en la Germania dal Sid mussan ch’ils chastels han apparentamain gì ina rolla impurtanta tar la redacziun da documents. Per la part tudestga da la Svizra manca in studi uschè extendì. A maun da l’exempel da duas famiglias signurilas – ils conts da Kyburg ed ils conts da Habsburg – empruvain nus dad obtegnair in resultat cumparegliabel.

I sa mussa che l’impurtanza da chastels sco lieus d’emissiun per in document è differenta tar las duas famiglias perscrutadas. Ils conts da Kyburg laschan rediger 36% da lur documents en in chastè, ils conts da Habsburg percunter mo 8% da lur documents; els prefereschan citads sco lieus per lur acts giuridics.

Per signar in document duvravi era perditgas che vegnivan per part numnadas cun num, per part resumadas cun la furmla «et alii quamplures [ed ulteriurs]». Perquai era il signar dad in document savens in eveniment cun blers participads, per ils quals il chastè stueva avair avunda stanzas. Per quest motiv eran mo chastels pli gronds adattads per signar documents e vegnivan uschia preferids da las autoritads che emettevan ils documents.

Davart las stanzas d’in chastè na vegnin nus a savair nagut en ils documents, per il pli stat mo «en» u «sper il chastè...», uschia che nus stuain supponer ch’ils documents sajan savens vegnids signads sut tschiel avert davant il chastè.
Lia rumantscha (Cuira/Chur)

Wild, Werner : «scriptor comitis» – Burg – Bautätigkeit? Arbeitshypothesen anhand einiger Beispiele («et alii quamplures!») aus der deutschen Schweiz
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 15. Jahrgang 2010, Heft 3, 93 - 109.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch