Mittelalter 2010/4
Heft 2010/4    1. Artikel

L’alchemist en il chastè da Forstegg

par Peter Kurzmann

Il Museum naziunal svizzer conserva sut il numer d’inventar AG 2668 in guaffen da fier en la furma d’in Y stendì ch’è enfin oz anc betg definì. La part lunga che finescha en in piz ha in tagl traversal triangular ed è engravà da segns senza dubi alchemistics. In document dal 18avel tschientaner relata ch’il funcziunari superiur dal Signuradi da Hohensax da lez temp, dr. Johann Heinrich Wolf, haja chavà ora l’object l’onn 1707 en il chastè Forstegg (quella giada Forsteck), ensemen cun auters guaffens da fier.
Il chastè da Forstegg era en possess dals baruns da Hohensax. Tranter ils represchentants da questa impurtanta schlatta nobla svizra vegn en dumonda sco anteriur possessur da l’object unicamain Johann Philipp da Hohensax (1553–1596), in um da gronda savida ed aderent da la cretta calvinistica refurmada. El ha studegià linguas anticas, medischina, istorgia, filosofia e dretg a Genevra, Heidelberg, Paris ed Oxford, nua ch’el ha acquistà il titel d’in magister artium. El è stà activ sco impurtant diplomat e militar en servetschs dal cont da Kurpfalz e dal duca da Nassau. Il 1594 ha el prendì dimora en il chastè da Forstegg. Igl è tuttavia pussaivel ch’el è sa fatschentà là cun studis d’alchemia e ch’el ha installà in laboratori. En connex cun ina dispita d’ierta al ha assassinà in nev da la lingia catolica da la famiglia l’onn 1596 en l’ustaria Löwen a Salez.

Il guaffen da fier vegn interpretà sco fier da pigna ch’ins duvrava en laboratoris d’alchemia. En quest cas però na sa tracti probablamain betg d’in simpel fier da pigna. Sin fundament da l’elavuraziun premurusa e la ritga decoraziun al pon ins attribuir a la gruppa dals objects da parada che servivan a la represchentaziun e ch’ins enconuscha dals circuls aristocratics u d’alchemists bainstants. Il stil, il decor ed il context da quest object permettan d’al datar en il 16avel tschientaner. Ils segns alchemistics èn da vesair sco in’enumeraziun da noziuns alchemisticas engravadas sin il fier senza in context vesaivel – pia propi mo per motivs decorativs. Per part n’als pon ins betg explitgar, quai che ha franc da far cun il cunfar clandestin dals alchemists.
Lia rumantscha (Cuira/Chur)

Kurzmann, Peter : Der Alchemist auf Burg Forstegg
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 15. Jahrgang 2010, Heft 4, 117 - 126.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch