Mittelalter 2011/1
Heft 2011/1    1. Artikel

Ils chastels-fortezza sin il Mannenberg datiers da Zweisimmen

La perscrutaziun e la restauraziun archeologica da la construcziun dal chastè-fortezza Untere Mannenberg 2008–2011

par Armand Baeriswyl et Daniel Kissling

Il martgà da Zweisimmen situà al punct, nua che s’uneschan la Pitschna e la Gronda Simme, è il center istoric dal Oberes Simmental. A partir dal 12avel tschientaner è la signuria da Mannenberg stada en possess dals baruns dal Simmental e sa cumponiva d’in conglomerat d’agen possess aristocrat e da feudalissem zähringic. Pli tard è ella ida en ils mauns dals baruns da Raron e vegn documentada per l’emprima giada il 1270. En consequenza da la Battaglia da Laupen (1349) han truppas bernaisas destruì ils chastels-fortezza da Mannenberg e Laubegg. Suenter la Battaglia da Sempach ha la citad da Berna installà sia podestataria dal Simmental en il chastè da Blankenburg. Quella ha ella pudì mantegnair fin la Revoluziun franzosa.

Sin il crest dal chastè sa chattan duas ruinas: il chastè-fortezza Untere Mannenberg a la spunda meridiunala ed il chastè-fortezza Obere Mannenberg situà var 200 meters davent da quel sin il punct il pli aut da la collina. I n’è damai betg sclerì da tge chastè-fortezza ch’i sa tracta, cura che las funtaunas scrittas rapportan dal Mannenberg.

Las perscrutaziuns archeologicas èn sa restrenschidas en general a la miraglia verticala a la surfatscha ed han tangà mo in pitschen sectur da la construcziun medievala. Il chastè-fortezza è vegnì bajegià a l’entschatta dal 13avel tschientaner e sa cumponiva d’in mir da tschinta cun dus portals, d’in edifizi d’abitar e d’ina tur probablamain quadrangulara. Quella tur è vegnida remplazzada pli tard (probablamain suenter l’onn 1250) tras ina tur radunda. Ils fundaments da quella existan fin oz.
Il 1349 han ils Bernais destruì quels dus chastels-fortezza – quai pon ins demussar grazia a las restanzas d’incendi en la ruina. La pretensiun ch’ins chatta en la litteratura pli veglia ch’il chastè-fortezza Untere Mannenberg saja vegnì construì enturn il 1350 en substituziun dal chastè-fortezza Obere Mannenberg disfatg il 1349 è uschia dal tuttafatg nunfundada. Cunquai ch’ils dus chastels-fortezza n’èn betg pli vegnids reconstruids suenter la devastaziun, ha la citad da Berna endrizzà sia podestataria l’onn 1386 en la Blankenburg ch’era da lezzas uras anc abitabla.

La miraglia da la ruina dal chastè-fortezza Untere Mannenberg è vegnida conservada dal 2008 fin il 2010 ed è vegnida integrada en ina via circulara da chastels che cumenza a la staziun da Zweisimmen; la via è munida cun numerusas tavlas d’infurmaziun.
(Lia Rumantscha Cuira/Chur)

Baeriswyl, Armand Kissling, Daniel : Die Burgen auf dem Mannenberg bei Zweisimmen
Die bauarchäologische Untersuchung und Restaurierung des Unteren Mannenbergs 2008–2011
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 16. Jahrgang 2011, Heft 1, 1 - 14.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch