Mittelalter 2011/3
Heft 2011/3    1. Artikel

Palatium imperiale  Novas scuvertas davart il chastè palatin sin il Lindenhof a Turit

par Andreas Motschi

Il 1937/38 ha Emil Vogt fatg en il rom d´in project scientific vastas exchavaziuns sin il Lindenhof a Turitg. Tranter auter ha el scuvert las restanzas d´in chastè dal temp roman tardiv sco era da dus edifizis monumentals dal temp medieval. El ha interpretà quels sco dus edifizis palatins consecutivs dal temp carolingic ed ottonic. La preschentaziun e la discussiun da questas scuvertas en sia monografia dal 1948 han introduci novs standards en l´archeologia dal temp medieval en Svizra. Il tema principal da l´artitgel preschent è l´edifizi palatin pli giuven. Suenter ulteriuras exchavaziuns pon ins oz fixar ses plan orizontal sin ina lunghezza d´almain 75 meters. Sia orientaziun è vegnida influenzada essenzialmain da mirs dal temp roman tardiv ch´eran anc intacts ed èn vegnids integrads en la construcziun. L´edifizi cun ina largezza da 23 meters sa cumpona d´ina retscha da stanzas, da las qualas la gronda sala principala che vegniva duvrada per intents represchentativs mesira a l´intern 31,2 x 11,4 meters. Restanzas dals pilasters mussan che la part centrala da la sala era tschentada per travers da l´axa principala. Salas cun ina concepziun sumeglianta chatt´ins en ils palazs da Paderborn e Goslar, ils quals èn vegnids construids durant l´emprima mesadad dal 11avel tschientaner. Tranter las autras parts dal chastè da Turitg pon ins identifitgar bain la pitschna chaplutta ch´è construida sur ina tur dal temp roman tardiv. Co interpretar ils locals d´abitar e da lavurar che sa chattan al nord ed al sid da la sala principala sco er en il tract da l´ost è main cler. Il 2008 han ins scuvert vi dal mir da la fatschada dal tract da l´ost in pilaster da paraid cun ina basa da crap da sablun. Quel sa referescha ad in element identic che Emil Vogt aveva chattà damanaivel. Nus possedain pia perditgas impurtantas da la structura da la fatschada, la quala vegn mussada qua en ina reconstrucziun nova. Quella presuppona ch´il chastè palatin aveva dus plauns cun duas salas situadas ina sur l´autra. Sin fundament da ponderaziuns istoric-politicas pon ins dir che l´edifizi datescha dal temp da regenza da Heinrich III. (10401056), ma las metodas da dataziun da l´istorgia d´art e da l´archeologia na lubeschan actualmain betg da confermar las datas cun la precisiun giavischada.

Lia Rumantscha (Cuira/Chur)

Motschi, Andreas : Palatium imperiale - Neue Befunde zur jüngeren Königspfalz auf dem Lindenhof in Zürich
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 16. Jahrgang 2011, Heft 3, 65 - 87.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch