Mittelalter 2011/3
Heft 2011/3    2. Artikel

Il laboratori emblidà en il Chastè da La Punt

par Peter Kurzmann

Il Chastè da La Punt, nua ch´il Rain Anteriur ed il Rain Posteriur s´uneschan, posseda ina particularitad: en in´ala laterala è sa mantegnî in laboratori chemic da la mesadad dal 19avel tschientaner cun l´equipament original. Usualmain èn mantegnids da laboratoris vegls mo recipients ed utensils, forsa illustraziuns, fertant che l´equipament architectonic original è î a perder per adina en consequenza da modernisaziuns, transfurmaziuns u schizunt demoliziun. En il Chastè da La Punt èn las localitads cun l´equipament tecnic vegnidas mantegnidas per gronda part ed ultra da quai era blers recipients, utensils e documents. Qua èn sa cruschadas e per in temp idas a pèr las vias da dus impurtants chemicists dal 19avel tschientaner, numnadamain dal praticher dr. Adolf von Planta (1820–1895) e dal teoreticher dr. August Kekulé (1829–1896).

Il laboratori a La Punt deriva da dr. Adolf von Planta. El è naschî en il chastè, ha studegià scienzas natiralas a Berlin, Heidelberg e tar Justus Liebig a Giessen ed ha fatg il doctorat l´onn 1845 a Heidelberg. Per cuntinuar cun sia lavur ha el endrizzà il 1852 in laboratori en il chastè ed engaschà August Kekulé sco assistent tenor il cussegl da Liebig.

Von Planta s´interessava per la retschertga chemic-analitica da substanzas natiralas e da provas da la terra e da l´aua, per l´andament da process fisiologics sco era per la scienza d´avieuls, la botanica e l´orticultura. L´influenza da Liebig è evidenta. Las lavurs communablas cun Kekulé han cumenzà cun l´analisa da dus alcaloids (coniin e nicotin) ed èn s´extendidas a l´analisa da crappa da chaltschina, da vin, da crappugls dal fel ed oravant tut da las auas mineralas da Serneus e da San Murezzan.

L´onn 1853 ha Kekulé terminà sias activitads en il Chastè La Punt. Cun Adolf von Planta è el dentant restà en contact amicabel. L´ulteriura carriera scientifica da Kekulé ha manà el l´emprim a Londra, suenter la habilitaziun a Heidelberg, il 1858 sco professur a Gent e la finala l´onn 1867 a Bonn nua ch´el è mort sco um aut prezià l´onn 1896. En spezial pervia da sias enconuschientschas da la chemia da structura (el ha p.ex. identifitgà la valenza quadrupla da carbon ed ha gî l´idea geniala da la structura circulara dal molecul benzol) è el stà in dals pli impurtants chemicists dal 19avel tschientaner.

Suenter la partenza da Kekulé ha von Planta lavurà vinavant sin ses champs da lavur ch´eran economicamain per part fitg impurtants per il Grischun. L´onn 1895 è el mort a Turitg, nua ch´el è era vegnî sepulî.

La famiglia von Tscharner che posseda oz il Chastè La Punt vul mantegnair il laboratori cun ils fastizs dal temp. La famiglia observa questa finamira cun in grond engaschament temporal e finanzial. Nus sperain che questa publicaziun haja sveglià l´interess per quest lieu d´impurtanza istorica per il Grischun.

Lia Rumantscha (Cuira/Chur)

Kurzmann, Peter : Das vergessene Laboratorium in Schloss Reichenau
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 16. Jahrgang 2011, Heft 3, 88 - 99.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch