Mittelalter 2011/3
Heft 2011/3    3. Artikel

Ina chasa da purs da la gotica tardiva cun sala da festa: la chasa dal 1500/1505 a Grossgschneit, Köniz

par Heinrich Christoph Affolter

La chasa a Grossgschneit occupa la perscrutaziun dapi la segunda mesadad dal 19avel tschientaner. Suenter in´interrupziun pli lunga ha puspè pudi‘ vegnir fatga ina retschertga interdisciplinara ils onns 2007 fin 2010 . In´analisa da construcziun detagliada ha manà ad ina nova valitaziun dals resultats areguard l´edifizi, in´interpretaziun nova ed extendida da funtaunas e da litteratura concernent enconuschientschas pli precisas davart l´ambient social, politic ed economic dals possessurs da lez temp. Ultra da quai han pudi‘ vegnir confermadas constataziuns impurtantas ch´èn gia vegnidas publitgadas l´onn 1935.

Grossgschneit tutgava tar las set curts dal domini medieval Riedburt tranter Schwarzwasser, Sense e Scherlibach. Lur center, il chastè cun il medem num, è vegni‘ destrui‘ da Friburg l´onn 1386. Il domini sco tal ha existi‘ vinavant ed è restà durant il 15avel tschientaner en possess da famiglias vischinas. L´onn 1515 ha Anthoni Brüggler vendi‘ il domini giudizial a Peter von Schneit che possedeva duas curts. Il 1872 ha Johann Hostettler von Schwanden cumprà la chasa da purs signurila. Il cumenzament dal 21avel tschientaner abita e viva la sisavla generaziun da la famiglia Hostettler en la chasa da 500 onns.

La chasa gronda ch´è vegnida construida enturn l´onn 1500 a Grossgschneit è ina da las pli remartgablas chasas da purs da l´entir chantun. Ella è vegnida erigida dad in pur bainstant che ha ornà la chasa enturn l´onn 1500 cun parts architectonicas e decoraziuns cleramain signurilas. Gia dalunsch ves´ins la pretensiun signurila: il tetg aut a quatter alas ed il mir da la vart sidvest che cumpiglia 75 meters quadrat. Il mir massiv dueva mussar la prontezza da defensiun e cun quai cler e bain il status social dal possessur. A moda sumeglianta dattan en egl las fanestras da tuttas varts sin il plaun sura ch´èn dal tuttafatg nunusitadas sin il sectur puril. Questas fanestras eran probablamain mo per ina pitschna part da vaider ed en tscherts secturs schizunt mo attrappas.

En la part dal sid da la chasa han ins chattà ina sala da festa dal 16avel tschientaner e nunspetgadamain blers entagls e tavlas da vopnas fermadas a moda simmetrica, dentant senza cuntegn. Remartgabel èn era ils quaranta artgs a sparun sin tetg, ch´èn ornads cun tavlas da vopnas vidas.

La chasa gronda dal temp enturn l´onn 1500 ch´è vegnida mantegnida malgrà tut las intervenziuns è ina raritad. Grossgschneit è in solitari custaivel da quel temp pumpus.

Lia rumantscha (Cuira/Chur)

Affolter, Heinrich Christoph : Ein spätgotisches Bauernhaus mit Festsaal: Das Haus von 1500/1505 im Grossgschneit, Köniz
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 16. Jahrgang 2011, Heft 3, 100 - 109.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch