Mittelalter 2012/1
Heft 2012/1    1. Artikel

La fortezza ed il chastè da Brunegg –
resultats da las perscrutaziuns archeologicas

par Christoph Reding

La fortezza da Brunegg vegn construida en l’emprima mesadad dal 13avel tschientaner sin la part a l’ost dal Kestenberg. Ella è stada la sedia da servitids habsburgais che avevan d’administrar ils bains propris habsburgais. Enturn l’onn 1270 vegn menziunà en in document Wernher dem Schenken da Brunegg, il 1273 vegn numnada l’emprima giada la fortezza. La fortezza principala è probablamain vegnida concepida a l’entschatta sco fortezza cun mir da defensiun.

Durant il 14avel tschientaner posseda adina puspè autra servitid habsburgais–austriaca la fortezza. Enturn l’onn 1375 vegn la part principala da la fortezza destruida parzialmain d’in incendi. La reconstrucziun sequenta cun l’erecziun da la tur principala maina ad in rinforz da la fortezza. Quella vegn transfurmada quai che pertutga la tipologia architectonica da fortezzas ad ina furma maschadada d’ina fortezza cun mir da defensiun e d’ina cumbinaziun da tur principala e palaz. Il patrun è cartaivlamain stà Heinrich Gessler che ha stgaffì cun quest edifizi ina sedia signurila per l’agen diever.

Suenter ch’ils confederads han conquistà l’Argovia l’onn 1415 èn ils Bernais sa scagnads cun la famiglia Gessler pervia dal possess da la fortezza. Quella era gia davent da la segunda mesadad dal 15avel tschientaner decadenta. Davent dal 1473 la surpiglia la famiglia dals Segenser sco bain feudal bernais. Quella lascha però ir l’edifizi anc pli fitg en decadenza.

L’onn 1538 prendan ils Bernais definitivamain en possess la fortezza ed il terren circumdant e suttamettan il bain al podestat da Lenzburg. Brunegg perda uschia sia impurtanza sco sez d’aristocrazia resp. sez patrizian e daventa l’avantguardia dal sistem da turs da fortezza dals Bernais cun in manaschi puril annectà.

A partir dal 1555 cumenzan las lavurs da sanaziun vi da la fortezza, a moda pli concentrada vegnan quellas però fatgas enturn il 1620–1622 en consequenza da la periclitaziun entras la Guerra da trent’onns (1618–1648). Las lavurs da mantegniment da l’epoca bernaisa vulan en emprima lingia mantegnair il cumplex fortifitgà e betg exnum augmentar sia valur sco fortezza u edifizi represchentativ. Suenter che la fortezza era vegnida tutgada dal chametg gia il 1555 ed il 1627, lascha in’ulteriura burasca detunar l’onn 1664 la pulvra magasinada en la tur principala che ha en consequenza stuì vegnir reparada a moda provisorica. Apparentamain pir 20 onns pli tard sballuna la paraid nord da la tur e parts dal tract intermediar. Entant che la tur principala vegn laschada star sco mesa ruina, vegnan il palaz ed il tract intermediar puspè renovads.

Suenter il declin da l’ancien régime venda il chantun Argovia la fortezza ad ina persuna privata che lascha transfurmar l’implant en in ospital. La tur principala vegn spazzada sin l’autezza da l’edifizi d’abitar. Ultra da quai vegn l’entira fortezza principala messa sut in tetg unitar. Cun novas installaziuns en la fortezza principala, las lavurs da transfurmaziun da la part sut da la fortezza e la construcziun da terrassas da curtin vegn il confort augmentà. Cunquai ch’il diever da la fortezza sco ospital fa dentant naufragi, vegnan il chastè ed il terren circumdant en possess da la famiglia dals Hünerwadel da Lenzburg. Cun far las construcziuns internas daventa Brunegg in chastè. Dapi la mesadad dal 20avel tschientaner è il chastè en possess da la famiglia von Salis che lascha sanar el dapi il 1993.

Lia rumantscha (Cuira/Chur)

Reding, Christoph : Burg und Schloss Brunegg - Ergebnisse der archäologischen Untersuchungen
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 17. Jahrgang 2012, Heft 1, 1 - 28.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch