Mittelalter 2012/1
Heft 2012/1    3. Artikel

Il chastè da Sontg Andreas a Cham (ZG): l’evaluaziun da las perscrutaziuns dal 2009/2010

par Peter Holzer et Gabi Meier

Las lavurs da transfurmaziun en il chastè da Sontg Andreas a Cham (ZG) han permess a l’archeologia chantunala da Zug da perscrutar il 2009/2010 toc a toc l’entir chastè ed il conturn vischinant. Sut il mir da tschinta odiern han ins chattà restanzas minimas d’in mir pli vegl che sto vegnir datà sco fasa da construcziun 1 anc en il temp avant il 12avel tschientaner. La tesa sbittada da curt ch’il bain "Cham" menziunà en in document da l’onn 858 s. Cr. sa chattava en il lieu, nua che stat oz il chastè, sto vegnir reprendida anc ina giada considerond las expertisas fatgas. En la fasa da construcziun 2 è vegnida erigida la fortezza, da la quala è sa mantegnida la construcziun–chamischa (Mantelmauer) en il chastè odiern fin ad in’autezza da 12,05 m. In tagl da sondagi ordaifer il chastè ha mussà che l’implant era ultra da quai segirà era cun in foss ed ina bastiun.

En il nordost da la curt dal chastè era vegnì integrà en la construcziun–chamischa in bajetg da crap rectangular. Provas da charvun da lain da la maulta dal mir renvieschan ad ina dataziun dal chastè cun construcziun–chamischa (Mantelmauerburg) dal temp tranter la segunda mesadad da l’11avel tschientaner e l’emprim terz dal 13avel tschientaner.

L’implant existent è vegnì cumplettà en la fasa da construcziun 3 cun in ulteriur edifizi da crap en l’ost. En il 13/14avel tschientaner era sa sviluppada enturn la fortezza ina colonia quasi citadina che aveva survegnì da l’imperatur Karl IV il 1360 il dretg da martgà ed il dretg d’incorporar burgais. Il chastè da Sontg Andreas è vegnì assaglì il 1385/1386 durant las Battaglias da Sempach dals abitants da Zug e da Sviz.

L’onn 1533 è l’implant vegnì renovà durant la fasa da construcziun 4 dal landfoct Heinrich Schönbrunner. En la fasa da construcziun 5 è l’edifizi da crap a l’ost vegnì dividì en dus locals. Il local situà al nord cun fuaina e svidera vegniva apparentamain utilisà sco cuschina. Igl è da supponer che questa transfurmaziun ha gì lieu sut Kaspar Brandenberg che ha amplifitgà il chastè tranter il 1620 ed il 1671. Il 18avel tschientaner è il chastè ì en possess dal cartograf e litinent colonel Franz Fidel Landtwing che ha laschà planivar la bastiun ed emplenir il foss dal chastè. Patì ha l’implant durant l’occupaziun tras ils Franzos l’onn 1798. La cumplettaziun al chastè odiern è vegnida fatga il 1908 en la fasa da construcziun 6 entras ils architects Fred Page e Dagobert Keiser.

Lia rumantscha (Cuira/Chur)

Holzer, Peter Meier, Gabi : Schloss St. Andreas in Cham (Kt. Zug): Auswertung der Untersuchungen 2009/2010
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 17. Jahrgang 2012, Heft 1, 34 - 61.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch