Mittelalter 2012/3
Heft 2012/3    3. Artikel

>La construcziun da vias en il temp medieval tempriv fin classic a Sursee.
Exempels da Sursee–Mülihof e St. Urbanhof

par Christian Auf der Maur

Cun il cumenzament da l’urbanisaziun a partir dal 12avel tschientaner daventan las vias puspè pli e pli centralas en las funtaunas scrittas. Entant ch’ins propaghescha durant il temp medieval tempriv surtut d’utilisar vinavant l’infrastructura da l’antica tardiva, daventa il maletg pli e pli diffus ils tschientaners che suondan. L’archeologia pussibilitescha dentant da sclerir in zichel quest maletg.

En la vischinanza directa da la citad veglia da Sursee èsi reussì da scuvrir dus trassés da via sin ina distanza pli lunga. Quel en il sid da la citad veglia sper il Mülihof passa parallelamain tar il flum Sure. El mussa quatter fasas da cumplettaziun che tanschan senza interrupziun dal 7avel tschientaner fin il 12avel/13avel tschientaner. L’emprima fasa inditgescha ina via che cuvra rests d’abitadis gia pli vegls. Suenter pauc temp vegn la via cuverta cun ina rasada largia da glera. Tenor ils chats ha quai gì lieu durant il temp medieval tempriv. En la terza fasa vegn la via schlargiada e fixada cun crappa rutta e glera e cumplettada cun ina chinetta. La fasa datescha probablamain da la fin dal temp medieval tempriv u dal cumenzament dal temp medieval classic. A maun dals chats da fiers–chaval pon ins dir che la via vegniva duvrada gia il 11avel u 12avel tschientaner. L’ultima fasa mussa schlargiaments e reparaturas. Fiers–chaval ed ulteriurs chats cumprovan che questas lavurs èn vegnidas fatgas il 12avel fin 13avel tschientaner avant ch’ins ha chalà da duvrar la via.

Las ultimas duas fasas coincideschan cun la construcziun dal trassé da via en il nord da la citad veglia da Sursee ch’ins ha chattà sut il St. Urbanhof dad oz. Tuttas duas han tratgs sumegliants quai che reguarda la tecnica da construcziun, per exempel crappa rutta e glera sco cofradi ed ina rasada cumpacta da glera. Ultra da quai han tuttas duas vias ina chinetta.

Tuttas duas vias vegnivan duvradas per il transport da martganzia (binaris da chars). Il motiv da betg utilisar ellas pli è però mintgamai in auter. Entant che la via en il nord da la citad veglia vegn spustada mo per paucs meters a partir dal 1256 a basa d’ina mesira da planisaziun dal territori en connex cun la construcziun dal mir da la citad, na vegn la via sper il Mülihof insumma betg pli utilisada. Quai succeda durant il temp da la fundaziun da la citad da Sursee enturn la mesadad dal 13avel tschientaner e stat cartaivlamain en connex cun il mulin Müningen da la claustra dad Engelberg. Ina midada da possess pudess esser stà il motiv e quai stess danovamain en connex cun la fundaziun da la citad. Quest avis po dentant vegnir confermà u refusà mo tras ulteriuras retschertgas istoricas fundadas.
Lia rumantscha, Cuira/Chur

Auf der Maur, Christian : Der früh– bis hochmittelalterliche Strassenbau in Sursee. Beispiele von Sursee–Mülihof und St. Urbanhof
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 17. Jahrgang 2012, Heft 3, 149 - 162.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch