Mittelalter 2012/4
Heft 2012/4    1. Artikel

Chastè da Mesocco – in’examinaziun posteriura da l’istorgia da construcziun

par Augustin Carigiet

Il chastè da Mesocco è il pli grond cumplex fortifitgà dal Grischun. Il mars 1526 han ils Grischuns sfurzà la demoliziun dal chastè. L’onn 1925/26 è l’areal dal chastè vegnì chavà ora da la "Pro Campagna" sut la direcziun da l’architect Eugen Probst. Las ruinas èn vegnidas segiradas grazia a reconstrucziuns che fan senn. Gia l’onn 1986 èn ulteriuras lavurs da segirtad daventadas necessarias en connex cun la construcziun nova da la via naziunala A 13. Quellas èn sa limitadas a la vart dal nord dal cumplex. Durant ils onns 2006 fin 2009 han ins pudì segirar ils ulteriurs mirs da ruina en etappas grazia a la "Fondazione Castello di Mesocco". Questas ultimas lavurs èn vegnidas accumpagnadas dal Servetsch archeologic dal Grischun. La finamira da questa examinaziun posteriura da l’istorgia da construcziun dal Castello è stada da sclerir la successiun relativa dals mirs da ruina existents.

La pli veglia construcziun a l’intern dal cumplex fortifitgà è ina chaplutta antecessura dal temp medieval tempriv (1), la quala e vegnida visibla a l’intern da la ruina da la baselgia carolingica S. Carpoforo (2) grazia ad Eugen Probst. Al nord da quests dus edifizis sacrals sa dauza il Campanile a set plauns (3). Quel datescha tenor examinaziuns dendrocronologicas da l’onn 1067 (d).

La tur principala (4) è la pli veglia construcziun signurila da l’inventari da ruinas dad oz. Ella è probablamain vegnida construida cura che la famiglia de Sacco è sa furmada en il 12avel tschientaner. Il mir da tschinta il pli vegl (5) è vegnì scuvert a l’ur dal plateau vest. El collia il chantun sidvest da la tur principala cun il chantun nordvest dal Campanile.

Il 13avel tschientaner vegn construì da nov in emprim palaz (6). Il palaz dispona vers il nord d’in edifizi annex (7). A maun d’in mir da protecziun datti in engrondiment da l’areal da chastè vers il sidost (8). En quest mir sa furma l’entrada en il cumplex fortifitgà ch’è anc oz actuala. En l’engrondiment vers il sidost vegn construida ina chasa per far bogn (9).

Enturn l’onn 1400 vegn colliada la Rocca cun la construcziun nova dal palaz a trais plauns (10), ed in areal intern sa furma. Il mir da protecziun existent da l’engrondiment sidost vegn auzà per 2 meters (11). Simultanamain vegn la tur dal sid (12) construida da nov. L’entrada existenta al chastè vegn fortifitgada cun in’avantcurt (13). Il medem mument datti in engrondiment da l’areal dal chastè vers il nord (14). Questa fasa d’engrondiment la fin dal 14avel / l’entschatta dal 15avel tschientaner è probablamain vegnida incitada dad Albert de Sacco.

L’onn 1480 vegn il chastè cun domini sur il Mesauc vendì a Gian Giacomo Trivulzio da Milaun. Quest lascha amplifitgar il cumplex existent ad ina fortezza da defensiun. Ils mirs da tschinta existents vegnan rinforzads cun mirs da protecziun. Las turs massivas (17–21) èn munidas cun chanuns. Il corridor da defensiun, ch’è pli lartg che 3 meters, dispona vers l’exteriur d’in parapet sin consolas da crap stgalimadas trais giadas. Questa bastiun dals Milanais sa drizza cleramain vers il nord. Quai ha intimà ils Grischuns da sfurzar la demoliziun dal cumplex l’onn 1526.

Lia Rumantscha (Cuira)

Carigiet, Augustin : Castello di Mesocco  Eine Nachuntersuchung zur Baugeschichte.
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 17. Jahrgang 2012, Heft 4, 190-198.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch