Mittelalter 2012/4
Heft 2012/4    2. Artikel

Cama (Mesauc), ruina dal chastè da Norantola – dal mir da protecziun al Castello.

In’examinaziun da l’istorgia da construcziun

par Augustin Carigiet

La ruina dal chastè da Norantola è situà datiers da la fracziun cun il medem num da la vischnanca da Cama sin in spelm bass tranter il flum Moesa e l’autostrada A 13. Fin l’onn 1990 era la ruina creschida en fermamain e surlaschada a la decadenza. Grazia a l’iniziativa da la fundaziun locala "Associazione pro Castello di Norantola" ha la ruina da chastè pudì vegnir segirada cumplettamain e restaurada durant ils onns 1990 fin 1993, e quai tenor in project da Lukas Högl. En il decurs da las lavurs da restauraziun ha la Tgira da monuments chantunala examinà ils mirs da la ruina tenor l’istorgia da construcziun.

Il chastè da Norantola sa cumpona dad in mir da tschinta dad 1,5 m grossezza che cumpiglia ina surfatscha interna da 40 x 21 meters. Ils mirs nord e sid èn vaira parallels, entant ch’ils mirs vest ed ost suondan cun plirs anguls la topografia da la collina dal chastè. Ins po distinguer duas differentas fasas da construcziun vi dal mir da tschinta.

In mir da tschinta pli vegl è avant maun mo sco ruina d’ina destrucziun anteriura. En il mir nord han ins sfratgà or ina gronda brescha ed il mir sid è demolì cumplettamain. Vers il tschiel fineschan ils mirs existents dal vegl mir da tschinta cun ina lingia da demoliziun che na correspunda betg a l’autezza originala dal mir da tschinta.

En ina segunda fasa han ins reconstruì il mir da tschinta. Quel dispona survart d’in corridor da defensiun che va enturn. Il corridor da defensiun daventa pli bass da la vart dal sid e s’augmenta a maun da stgalims al vest ed a l’ost sin il nivel pli aut dal corridor da defensiun dal nord. Il corridor da defensiun è segirà vers la part exteriura cun in parapet da 50 cm grossezza che cuntegna balestreras e mirs cun dents crennads.

En la terza fasa d’engrondiment han ins rut il corridor da defensiun da la segunda fasa e surbajegià el. Al chantun sidvest dal cumplex han ins construì ina tur d’abitar a quatter plauns ed en la part ost in palaz. Lung il mir nord è sa furmà en pli in edifizi d’economia. Da la vart dal sid vegn construì in nov corridor da defensiun tranter la tur d’abitar ed il palaz. Il chastè vegn demolì vers la fin dal 15avel tschientaner.

Lia Rumantscha (Cuira)

Carigiet, Augustin : Cama (Misox), Burgruine Norantola  Von der Wehrmauer zum Castello. Eine Untersuchung zur Baugeschichte.
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 17. Jahrgang 2012, Heft 4, 177-189.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch