Mittelalter 2013/3
Heft 2013/3    2. Artikel

Ils baruns de Sax e la constituziun da la pussanza en la Val Mesauc

par Florian Hitz

Il chastè-fortezza da Mesocco deriva d'ina serra da vallada dal temp roman tardiv. In edifizi precedent a la baselgia dal chastè-fortezza ch'è anc oz avant maun è forsa vegnì erigì anc il 5avel, il pli tard però il 7avel tschientaner. Il patrocini da Son Carpoforus lascha supponer che la baselgia è vegnida fundada da Como u da Milaun. Per consequenza ha il chastè-fortezza mantegnì sia funcziun strategica oriunda  numnadamain quella da defender la vallada cunter invasurs dal nord  fin ch'ils Langobards han stuì ceder als Francs lur influenza sin la Val Mesauc.

La preschientscha signurila dals nobels libers de Sax è attestada per l'emprima giada il 1219 en in document concernent ina donaziun per il chapitel collegiat da San Vittore. Ina tala donaziun premetta il dretg da disponer da tut las baselgias da la val, damai d'avair il dretg da patrunadi. Il fatg ch'in tal dretg stueva exister è in indizi ch'ils de Sax avevan gia avant il 1219 ina tscherta influenza sin las baselgias respectivas. I mancan però cumprovas concretas per attestar ils dretgs feudals dals de Sax en la val avant il 1219. Insumma datti mo paucs indizis intscherts per lur preschientscha en la val avant questa data.

Ils de Sax figureschan en documents dal 12avel tschientaner ensemen cun autras famiglias noblas libras che sa sfadian per la constituziun da la pussanza en la Currezia. Tuttina sco quellas famiglias derivan er els da la Svevia. Enturn il 1200 cumenzan els a stabilir lur domini en il territori al sid dal Lai da Constanza: els surpiglian ils posts impurtants da l'abazia da Son Gagl e construeschan in chastè-fortezza en la vallada dal Rain Alpin ch'els numnan Sax (tenor lur schlatta importada dal Guaud Nair). Ultra da quai acquistan els las prefecturas dal chapitel catedral da Cuira e dal chapitel dals premonstratens da Churwalden.

Sco aderents dals imperaturs da la dinastia dals da Hohenstaufen giaudan ils de Sax blers privilegis, quai ch'è ina premissa fundamentala per lur success. Durant il temp da regenza da retg Friedrich II daventa quest liom cun la chasa dals da Hohenstaufen anc pli ferm. Tranter il 1212 ed il 1219 prestan Ulrich II de Sax, avat da Son Gagl, e ses frar Heinrich II numerus servetschs en l'interess da l'imperi. Persuenter obtegnan els sco feud duas prefecturas imperialas: la claustra da Mustér e la Val dal Blegn. Suenter curt temp vegnan lur dretgs per la Val dal Blegn però contestads dal chapitel catedral da Milaun. Ils de Sax n'han betg in diplom imperial ni per la claustra da Mustér, ni per la Val dal Blegn ni per il contadi da Mesauc. Lur dretgs feudals en la Val Mesauc èn explitgabels sulettamain cun lur approximitad al retg.

Anc avant il 1239 ha lieu ina midada da generaziun en la chasa de Sax. Ils frars regents dividan il domini: Heinrich III surpiglia la Val Mesauc, Albrecht III la prefectura da Faveras ed Ulrich III il chastè-fortezza e la signuria de Sax en la Val dal Rain.

Quel mument decida Heinrich d'extender sia sfera d'influenza era senza il sustegn da la suveranitad imperiala, gea schizunt cunter quella. Ensemen cun ils alliads guelfics-milanais acquista el il 1242 Bellinzona. Ad el reusseschi da s'imponer sco chastellan e signur territorial. Suenter curt temp sto el però returnar il butin a la republica da Como. Enturn il 1247 sa retira el en il Moesano ed erigia a Santa Maria en la Val Calanca ina tur d'abitar imposanta e fitg represchentativa. La tur è situada en in lieu pli avanzà en cumparaziun cun il chastè-fortezza en la Val Mesauc.

Ensemen cun ses frar pli giuven Albert regia Heinrich a partir dal 1253 en il nov castro de Calancha sco cont e vicegraf da la Val Mesauc. Quest fatg ch'è central per l'istorgia da la pussanza regiunala e per la periodisaziun da la construcziun da chastels-fortezza en il Moesano han ils perscrutaders dal 19avel e 20avel tschientaner ignorà dal tuttafatg.

Il chastè-fortezza da Mesocco daventa ina residenza stabla, pir cura che Albert III de Sax sto ceder il 1257 la fortezza da Wartenstein e la prefectura da Faveras a la claustra da Faveras. A partir da quel mument sa spartan ils destins dals dominis dals de Sax en la Val dal Rain ed en il Moesano. Durant quel temp vegn probablamain terminada l'amplificaziun extendida dal chastè-fortezza da Mesocco. Suenter che Albert è sa chasà en il chastè-fortezza, politisescha el activamain en la Val Mesauc. Pir suenter sia mort l'onn 1279 vegn dividida la signuria de Sax er en il Moesano. Ins s'orientescha tenor ils dus gronds chastels-fortezza. La signuria de Sax-Calanca che tutga a Heinrich III cumpiglia la part sut da la val fin a Lostallo. La part sura da la val, la signuria de Sax-Mesocco che cumpiglia Mesocco e Soazza, passa percunter al domini dals figls dad Albert III.

En il decurs dal 13avel tschientaner tardiv daventan ils dus chastels-fortezza centers da l'activitad politica creschenta en il territori da las signurias. Albert III procura davent da sia sedia a Mesocco ch'il territori alpin en Valragn vegnia colonisà da Gualsers. Questa acziun maina però ad in conflict d'interess cun ils baruns da Vaz che giudevan la simpatia dal retg e che avevan gia privà ils de Sax en il passà da las prefecturas da Cuira, Churwalden e Mustér. Ils figls da Heinrich III sustegnan cun acquistar bains d'alp davent da lur sedia a Santa Maria la furmaziun d'ina vischnanca en la Val Calanca.

Al cumenzament dal 14avel tschientaner bandunan ils figls da Heinrich la tur d'abitar en la Val Calanca per ir en il fund da la val e surpigliar ils chastels-fortezza da l'aristocrazia pitschna. Tut tenor basegn èn quels vegnids amplifitgads massivamain (Torre Fiorenzana a Grono resp. il chastè-fortezza Norantola a Cama). A l'extrada da la Val Mesauc nizzegian ils de Sax a partir dal 13avel tschientaner tardiv era la curt signurila da Roveredo e la Torre Palas a Monticello sper San Vittore, la quala els sezs han probablamain erigì.

Lia Rumantscha (Cuira/Chur)

Hitz, Florian : Die Freiherren von Sax und die Herrschaftsbildung im Misox.
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 18. Jahrgang 2013, Heft 3, 65 - 88.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch