Mittelalter 2014/1
Heft 2014/1    3. Artikel

La Dauphiné cunter la Savoia: in cumbat cun lantschas u cun armas politicas en il chastè da Valère a Sion?

Ornaments eraldics e cumbats da chavaliers en la Caminata (enturn il 1330)

par Gaëtan Cassina et Alain Besse

En il chastè dal chapitel catedral sin la collina da Valère a Sion è vegnida equipada l'entschatta dal 14avel tschientaner danovamain ina sala d'in edifizi construì in tschientaner avant. Il decor dissegnà vi da las paraids, il palantschieu sura ed il chamin è vegnì examinà pli detagliadamain en il decurs da las perscrutaziuns istoricas ed archeologicas da la construcziun; ils resultats èn vegnids sustegnids da dataziuns dendrocronologicas e d'ina examinaziun exacta dals objects durant la restauraziun dal 1997 fin il 1998.

Questa metoda da perscrutaziun cumplexa maina a novas enconuschientschas davart la Caminata, la sala da festa en il chastè da Valère. L'emprim han ins stuì reveder la dataziun vertenta da l'edifizi (enturn il 1225/30) sin fundament dals fatgs dendrocronologics. Quella era vegnida proponida ca. il 1900 entras ina perscrutaziun istorica. Tant las expertisas vi da la construcziun sco las datas da la dendrocronologia e las caracteristicas stilisticas mainan ad ina nova interpretaziun dals elements eraldics: en colliaziun cun ina scena da turnier illustrada sin il chamin regordan els fermamain ad in veritabel cumbat (politic). Il context istoric conferma ina dataziun da la sala sin la fin da l'emprim terz dal 14avel tschientaner che s'accorda bain cun l'illustraziun dad incidents politics e charplinas regiunalas da quella epoca.

Aymo von Turn, uvestg da Sion ed impurtant signur feudal en il Vallais, aveva refusà da surpigliar la rolla dal vasal dals conts da la Savoia, cunquai ch'el temeva lur finamiras d'expansiun en il Vallais. Sco descendent da la pli pussanta famiglia dal Vallais dal 13avel e 14avel tschientaner ha el residià en il chastè da Niedergesteln (Gestelnburg) dasper Raron. La famiglia era oriundamain da la Dauphiné (Alps da la Savoia dal Sid) ed uschia ha el fatg il 1327 in'allianza da protecziun e d'attatga cun il Dauphin da Viennois; il Dauphin era numnadamain in adversari declerà dals conts da la Savoia ch'el cumbatteva cun agid dad ulteriuras famiglias regiunalas, sco p.ex. ils conts da Genevra ed ils signurs da Charolon-Arlay. Las vopnas sin las travs dasper il chamin, sur la scena da turnier, en la quala la Dauphiné e la Savoia stattan ina visavi l'autra, regordan a quella coaliziun, mussan a medem temp però era la Savoia cun ses geniturs eraldics, ils retgs da la Frantscha e da l'Engalterra. L'uvestg da Sion, represchentà tras sia vopna en la curnisch da vopnas vi da la paraid da la sala, ha per l'ina vulì regurdar ad ina victoria che ses alliads futurs han obtegnì il 1325 sur la Savoia  ina represchentaziun dals success da sia politica. E per l'autra ha el era vulì trair endament la pasch da l'onn 1329 che ha garantì per curt temp la stabilitad politica.

Enfin ch'il chapitel catedral regiva sur la collina ed uschia era sur il chastè, pudeva l'uvestg sulettamain avdar là cun ina pitschna suita; pir a partir da la mesadad dal 14avel tschientaner è el stà en possess d'in agen bajetg. Quai è probablamain quel, nua che la sala da festa, la Caminata, sa chattava  il pli giudim il chastè, gist dasper il local da guardia.
Lia Rumantscha (Cuira)

Cassina, Gaëtan Besse, Alain : Dauphiné  Savoie : joute ou combat au château de Valère, à Sion ? - Décor héraldique et affrontement de chevaliers dans la Caminata (vers 1330)
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 19. Jahrgang 2014, Heft 1, 15 - 25.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch