Mittelalter 2014/2
Heft 2014/2    2. Artikel

La chasa da martganzia e chasa municipala da Schaffusa il 1395

In edifizi multifuncziunal en il temp tardmedieval

par Kurt Bänteli

Da maniera discreta e fin ussa pauc remartgada s'integrescha l'edifizi cun sia vart stretga en la lingia da chasas al sid da la Vordergasse ch'è oz la via cun las fatschentas principalas da la citad. El na sa preschenta pia betg a l'observatur cun sia vart lunga sco quai ch'i fiss adattà per ina chasa municipala e sedia actuala dals parlaments da la citad e dal chantun da Schaffusa. En pli ha l'edifizi il num plitost nunchapibel «Rathauslaube» introducì il 1922 che vala atgnamain mo per la sala senza pitgas en il plaun sura construida da quel temp. Il num irritescha adina puspè ils visitaders da l'edifizi.

Fin avant in pèr onns er'ins da l'opiniun ch'ins haja construì l'edifizi da l'entschatta sco chasa municipala ed en etappas da plirs decennis. L'emprim messadi deriva da l'onn 1382, cura ch'il cussegl ed il vischin Heinrich von Mandach èn sa cunvegnids davart l'utilisaziun dal mir-spartafieu da Mandach e davart la lingia da deflussiun da l'aua da tetg. Ins ha datà l'inauguraziun ensemen cun l'emprima sesida dal nov cussegl grond la primavaira 1412. Il cussegl sa cumponiva da mastergnants e commerziants che han cumenzà a sa participar a la pussanza politica cura ch'ins ha introducì la constituziun da la mastergnanza il 1411. Fin alura era la pussanza en ils mauns da l'aristocrazia.

Pir perscrutaziuns dendrocronologicas han mussà cleramain che l'edifizi è vegnì construì ils onns 1394/95 e che la funtauna dal 1382 è da chapir mo sco decleraziun d'intenziun. Ils quints da la citad mussan che la chasa è vegnida construida l'emprim sco chasa da martganzia per magasinar martganzia, per il commerzi e surtut era per la fiera. Pir cun engrondir l'edifizi ils onns 1411-13 è vegnida tiers la funcziun sco chasa municipala. La datoteca da chasas da citad ch'è vegnida creada en in rom privat ha pussibilità cun agid da cudeschs da taglia, quints da citad ed autras funtaunas en scrit da reconstituir l'endrizzament medieval da l'edifizi e da reconstruir ils purtrets da ses mastergnants da construcziun, dals uffiziants, dals cussegls, dals derschaders, dals praschuniers, dals visitaders da la citad e da blers auters. Las funtaunas han en pli demussà che l'edifizi è vegnì utilisà sco graner, arsenal, local d'exposiziun, sala da festa durant il turnier e probablamain sco residenza temporara dals ducas austriacs. Grazia a lur grondas hallas èn las chasas da martganzia da las citads medievalas daventadas edifizis multifuncziunals da las burgaisas e dals burgais.
Lia Rumantscha (Cuira)

Bänteli, Kurt : Das Kauf- und Rathaus in Schaffhausen von 1395 - ein multifunktionales Gebäude des Spätmittelalters
Mittelalter – Moyen AgeMedioevoTemp medieval, Zeitschrift des Schweizerischen Burgenvereins, 19. Jahrgang 2014, Heft 2, 59 - 69.

platzhalter

 
platzhalter
 
 
DE
FR
IT
RO
 
Geschäftsstelle des Schweizerischen Burgenvereins · Blochmonterstrasse 22 · CH–4054 Basel
T +41 (0)61 361 24 44
info@burgenverein.ch / praesident@burgenverein.ch